Оскуолабыт директора, Анатолий Николаевич Чиряев идеятынан ийэ, аҕа, оҕо уонна учуутал бииргэ «Спорт уонна мин» диэн ааттаах спортивнай тэрээһин ыытылынна. Бу күрэх сыала–соруга доруобуйаны бөҕөргөтүү, спорт араас хайысхатыгар интириэһи үөскэтии, дьиэ кэргэни бииргэ түмүү буолар.
Күрэх орто сүһүөххэ тахсыбыт 5-ис кылаастарга ананна. Саҥа учууталларга, бэйэ–бэйэлэригэр үөрэнэ сылдьар кэмнэригэр сөптөөх күрэх буолан ааста. Бу иннинэ выпустниктар оскуола араас үлэтигэр хаһан баҕар өйүөхтэрин баҕарар санааларын эппиттэр. Онон «BodyLine» фитнес киинин төрүттээччи, Гаврил Винокуровка билсэн, санааларын эппиттэрин, сонно тута сөбүлэһэ охсон, тэрийсэрин, көмөлөһөрүн биллэрбит.
Кини күрэхтэһии саҕаланыытыгар звезднай разминка ыытта. Манна оҕолор да, төрөппүттэр да кини блогерын, чөл олоҕу тутуһааччы, фитнес тренер буоларын билэр буоланнар, бары олус көхтөөхтүк өрө көтөҕүллэн туран разминка оҥордулар. Бу тэрээһини ыытыыга иитэр–үөрэтэр отдел үлэһиттэрэ чуолаан Кристина Руслановна, уонна бэһис кылаастары физкультураҕа үөрэтэр Николай Гаврильевич буолаллар.
Этаптары барытын Николай Гаврильевич бэйэтэ толкуйдаабыт. Онон тэрийиигэ оскуола, выпустник уонна төрөппүт буолан көмөлөөн ыыттылар. Түмүккэ наһаа үчүгэй тэрээһин буолан таҕыста. Жюрига бэйэбит оскуолабыт оҕолоро олордулар. Ол курдук Сысолятина Сайаана художественнай гимнастикаҕа республика, «Азия оҕолоро» Аан дойдутааҕы спорт оонньууларын 2024 сыллааҕы чемпионката, Игнатьев Влад легкай атлетикаҕа республика, «Азия оҕолоро» Аан дойдутааҕы спорт оонньууларын 2024 сыллааҕы чемпиона уонна директор советнига Дайаана Сергеевна буолан, тыҥааһыннаах күрэх түмүгүн таһаардылар. Кыттааччылар эстафета, кубик туруоруу, хоккей, ханааты тардыы уо.д.а. көрүҥҥэ күөн көрүстүлэр.
Түмүккэ 5 “в” кылаас бастакы миэстэни ылыан ылла. Кыттааччылар көхтөөхтүк кытыннылар, дуоһуйа сынньаннылар. “Спорт уонна мин” диэн 5-ис кылаас оҕолоругар уонна төрөппүттэригэр аналлаах тэрээһин сыл аайы ыытыллыа диэн эрэнэ хаалабыт. Түмүккэ кыайыылаах 5 «в» кылаас салайааччытын кытта кэпсэттибит.
— Екатерина Михайловна, бу күрэх түһүнан санааҕын истиэхпитин баҕарабыт.
— Мин быйыл үөрэхпит бүтэрээт бу 17№ — дээх орто оскуолаҕа математика учууталынан ананан кэлбитим. Бу күрэххэ кылааһым оҕолорун , төрөппүттэрин кытта тэҥҥэ кыттан, өссө ыкса билистибит. Манна Гаврильева Мичийэ, Березовский Дима уонна 4 төрөппүтү кытта бэйэм кыттыбытым. Уопсай алта этап баара, онно канат тардыһыыга бастаабыппыт , уоннааҕыга барытыгар иккис буолан, уопсай түмүгүнэн бастаан тахсыбыппыт. Кылааһым оҕолоро биһигини көрө, өйүү кэлбиттэрэ. Бастааммыт бары үөрүү — көтүү буолбуппут, барыбытыгар грамота, кубок, бэлэх туттарбыттара. Оҕолор да, төрөппүттэр да астына дуоһуйан барбыттара. Маннык тэрээһиннэр өссө да ыытылла турдуннар.
Яна Васильева, Дьокуускай куорат 17 № — дээх орто оскуола 10 «В» кылаас үөрэнээччитэ