Алтынньы 20 күнүгэр Мэҥэ Хаҥалас улууһун С.З.Борисов аатынан Тыыллыма орто оскуолатыгар 15 саастаахтар күннэрин бэлиэтээтибит. Бу сааһы «Сардаҥа саас» диэн ааттыыллар. 15 саастаах кыыс, уол оҕоҕо Айыы уота сардаҥаран тастарыгар биллэ-көстө сылдьар буолар, кыыс оҕо кэрэтэ өтөн тахсар, уол оҕо хоһууна хоһулаһар диэн өбүгэлэрбит бу сааһы болҕойоллор эбит. Ити күн сахалыы сиэри-туому тутуһан, тэрээһин бэрт көхтөөхтүк барда. Оҕолор уонна төрөппүттэр сахалыы таҥастарын –саптарын симэнэн кэлбиттэр. Бастаан оҕолор, төрөппүттэр хобо чуораан тыаһынан, боҕуруоскай от сытынан ыраастанан, алгыс тылын өйдөрүгэр-санааларыгар иҥэрдилэр. Алгыһы саха тылын учуутала Аргунова М.П. эттэ. “Төрөөбүт төрүт тылым” бырайыак салайааччыта, нуучча тылын учуутала Егорова Е.П. уонна 9 кылаас салайааччыта, информатика, физика учуутала Банчина Л.А. оҕолорго сахалыы ааттарын этэн туран, эҕэрдэ суруктары туттартаатылар. Төрөппүттэр уолаттарга үрүҥ сылгы сиэлиттэн харысхал, оттон кыргыттарга илин кэбиһэр бэлэх ууннулар уонна сахалыы истиҥник көхсүлэриттэн таптайан, сүүстэриттэн сыллаатылар. Ол кэнниттэн сахалыы астаах-үөллээх сандалы тула олорон, өбүгэ оонньууларын оонньоотулар: таабырын таайдылар, өс хоһооннору ситэрэн биэрдилэр, булугас өйдөрүн тургутан көрдүлэр. Маны таһынан, сүүрүүлээх-көтүүлээх оонньуулар сэргэхситтилэр: “Хардаҕас суулларыыта”, “Ой дуораана”, “Тобук таайсыыта”, “Кулун куллурустуур”. Оҕолор да, төрөппүттэр да астынан-дуоһуйан тарҕастылар.
Төрөппүт Борисова Анастасия Александровна санаатын үллэһиннэ:
Биһиги урут үөрэнэр эрдэхпитинэ, маннык сахалыы тыыннаах тэрээһиннэр суох этилэр. Билигин бэйэм үөрэ-көтө оҕом тэрээһинигэр, “Сардаҥа сааска”, астына сырыттым. Ордук өс хоһооннору ситэрэн биэриини сөбүлээтим. Баҕа санаам диэн, маннык истиҥ тэрээһиннэр элбэхтик буола турдуннар.
9 кылаас үөрэнээччитэ Алексеева Алиса:
“Сардаҥа саас” тэрээһин наһаа үчүгэйдик ааста. Таабырыны таайсыыны уонна өс хоһооннору ордук сөбүлээтим. Мин “Тобук таайсыыта” уонна “Хардаҕас охторуу” диэн оонньуулары саҥа биллим.
Сахалыы тыыннаах тэрээһиннэр оҕо кутун-сүрүн уһугуннарар, саха омугун сайыннарар аналлаахтар. Сардаҥа саастаах оҕолорго ситиһиини баҕарабыт. Саха кыыһа, саха уола буолан сандаардыннар!
Амина Игнатьева, Х кылаас,
С.З.Борисов аатынан Тыыллыма орто оскуолатын “Урсун» медиа-киинин кэрэспэдьиэнэ
Хаартыскаҕа түһэрдэ: Света Никифорова, Х кылаас үөрэнээччитэ
Кэскил14.ру