Төрөөбүт тыл, сурук-бичик күнүн көрсө олунньу 13 күнүгэр Алексей Фёдорович Алексеев аатынан Чуукаар орто оскуолатыгар сахалыы тыыннаах «Астык» ресторан-остолобуой арылынна.
Чуукаар орто оскуолатын олоҕор олунньу 13 күнэ үөрүүлээх уонна умнуллубат түгэнинэн буолла. Бу күн оскуолаҕа сахалыы тыыннаах, дьоһуннаах «Астык» диэн ааттаах ресторан үөрүүлээх арыллыыта буолла.
Манна сахалыы төрүт култуурабыт, сиэрбит-туоммут, итэҕэлбит тыына барыта иҥэриллэн оҥоһуллан көрүөх кэрэ көстүүнү бэлэхтээтэ. Оскуола оҕолоро, учууталлар уонна кэлбит ыалдьыттар сахалыы оһуордаах-мандаралаах, иһирэх быһыылаах-таһаалаах эйгэҕэ киирдилэр. Мантан ыла оскуола оҕолоро сахалыы тыыннаах, дьэрэкээн көстүүлээх мааны аһыыр сиргэ минньигэс аһынан үссэнэр буолуохтара. Элбэх сахалыы мааны иһиттэр, сахалыы тыыннаах хартыыналар, былыргылыы симэхтэр уонна сахалыы тигиилэр киһи хараҕын сынньаталлар, дууһаны үөрдэллэр. Ресторан аата бэйэтэ этэринэн, манна баар астар барыта астык, минньигэс эрэ буолбакка, сахалыы сүбэнэн, ыраас сүрэхтэн оҥоһуллаллар.
Биһиги оскуола сахалыы иитиибитин сүтэрбэккэ, бэйэбит омукпут ураты көстүүлэрин өрө тутан үөрэнэбит. Ону таһынан оскуолабыт суоҕунан, саҥа оскуолабыт тутуллан бүтэ илигинэн, биһиги нэһилиэкпит кулуубугар үөрэнэ олоробут. Онон бу тэрээһин биһиги оскуолабытыгар улахан суолталаах. Билии ылар, үөрэнэр, үлэлиир сирбит тупсан, саҥалыы тыыннанан сэргэхсийэ түспүтэ олус үчүгэй.
«Оҕолорбут аһыыр астарын уонна олорор сирдэрин нөҥүө сахалыы тыыннарын, күүстэрин-уохтарын өссө күүһүрдүөхтэрэ, үөрэххэ, билиигэ дьулуһуулара өссө улаатыа диэн эрэлбит улахан», — диир биһиги директорбыт Июлия Илларионовна. Бу ресторан хас биирдии үөрэнээччигэ бэйэтин омугун ытык өйдөбүллэрин умнубатыгар, удьуор ситимин быспатыгар тирэх буолуоҕа дии саныыбын.
Арыллыы үөрүүлээх түгэнин оскуола оҕолоро чабырҕаҕынан, ырыанан киэргэттилэр. Кыһыл лиэнтэни оскуолабыт дириэктэрэ Июлия Илларионовна Фёдорова уонна оскуола президенэ 9 кылаас үөрэнээччитэ Аян Попов быстылар. Үөрэнээччилэр, ол эбэтэр биһиги, оскуолабыт салайааччыларыгар олуһун махтанабыт. Биһиги сырдык-ыраас, кэрэ эйгэҕэ үөрэнэрбит туһугар үһүһү оҥороргутун билэбит уонна сыаналыыбыт.
«Астык» ресторан арыллыыта – Чуукаар оскуолатын саҥа ситиһиитэ, сахалыы тыыннаах үөрэх тэрилтэтэ буоларын өссө бигэргэтэр бэлиэ түгэн. Кэлэр кэмҥэ бу ресторан-остолобуой өссө сайдан, элбэх оҕону, дьону сахалыы култуураҕа сыһыарарыгар баҕарыаҕыҥ!
Дария ДАНИЛОВА,
Чуукаар орто оскуолатын 11 кылааһын үөрэнээччитэ, «Кэскил» эдкора.
Кэскил14.ру