Алтынньы 23 күнүгэр Майа нэһилиэгэр Д.Ф. Ходулов аатынан норуот айымньытын Дьиэтигэр анал байыаннай дьайыыга кытта сылдьар уолаттарбытын өйүүр «Дойдум-тирэҕим» көмө аахсыйа тэрээһинэ буолан ааста. Үтүө норуоппутун түмэр тэрээһин саамай уустук түгэннэргэ түмсэр, дьиҥнээх аһыныгас сыһыаны көрдөрөр сатабыллаах буоларбыт чаҕылхай туоһута буолла.
Тэрээһин кэмигэр олохтоох ас-үөл, бэйэ оҥоһук маллары атыылыыр дьаарбаҥка, маастар кылаастар буоллулар. Бу тэрээһиҥҥэ олохтоохтор, тэрилтэлэр эрэ буолбакка, анал байыаннай дьайыыга сылдьар саллааттарбыт ийэлэрэ, кэргэттэрэ, чугас дьонноро атыыга-эргиэҥҥэ, дьаарбаҥкаҕа бэлэмнэнэн кэлэн, улахан күүс буоллулар. Бу аһымал аахсыйаҕа биһиги оскуолаттан волонтерскай хайысхалаах 7 “б” кылаас (кыл. сал. М.Е. Новгородова), 8 «б» кылаас юнармейеецтара (кыл. сал. С.М. Дмитриева), “Толбон” уолаттар хордара, “Сардааналар” кыргыттар ансаамбыллара уонна 1 кылаас үөрэнээччитэ Денис Макаров (сал. С.А. Борисова, Р.А. Скрябина), 4 “а” кылаас кыргыттара үҥкүүлээн кыттыыны ыллылар.
Октябрина Никитична Кулешова, улуустааҕы социальнай политика управлениетын салайааччыта:
Майа сэлиэнньэтин дьаһалтата, Майа сэлиэнньэтин культура үлэһиттэрэ тэрийбит “Дойдум – тирэҕим” аахсыйа бэрт сэргэхтик ааста. Маннык аахсыйаҕа дьон-сэргэ бэйэтин баҕа өттүнэн, бэйэлэрэ түмсэн кэлэннэр байыннай дьайыыга сылдьар уолаттарбытыгар көмө оҥороллоро олус диэн кэрэхсэбиллээх уонна сотору биһиэхэ эйэ кэмэ кэлиэ диэн эрэл биэрэр курдук. Бүгүн манна хас биирдии оскуола, уһуйаан, тэрилтэ, түмсүү кэлэннэр бэйэлэрин кылааттарын киллэрэ туралларыттан киһи үөрэр. Бу аахсыйабыт норуот Д.Ф. Ходулов аатынан норуот айымньытын дьиэтин үлэһиттэрин идеяларынан быһа эпииринэн эмиэ бара турбута. Түмсүүлээх буолуоххайыҥ, биир буолуоххайыҥ, барыта табыллан иһиэҕэ!, — диэн бэлиэтээтэ.
Майа сэлиэнньэтин тыа сирин түөлбэтин дьаһалтатын дьиэ кэргэн киинин салайааччыта Владлена Владимировна Павлова эмиэ санаатын үллэстэр:
Биһиэхэ “Дойдум – тирэҕим” диэн быыстапка-дьаарбаҥка аһымал аахсыйа ыытылынна. Быыстапкаҕа анал байыаннай дьайыы кыттыылаахтарын дьиэ кэргэттэрэ кыттыстылар. Кинилэр араас маастар кылаастарга сылдьаннар бэйэлэрэ уруһуйунан, туойунан, оҕуруонан оҥорбут харысхаллара, оҥоһуктара дьоҥҥо-сэргэҕэ көрдөрүүгэ быыстапкаларын туруордулар. Маны таһынан биһиэхэ В.П. Ларионов аатынан оскуола 7 “б” кылааһын үөрэнээччилэрэ кэлэннэр бэйэлэрэ буһарбыт астарын, оҥоһуктарын атыылааннар, үп-харчы киллэрэн бэйэлэрин кылааттарын оҥордулар. Бу оҕолор тэрээһиҥҥэ кытта кэлбит дьоҥҥо саллааттарбытыгар алгыстаах сурук суруйтаран ыыттылар. Тэрилтэлэртэн МАУДО УПЦ (учебно-производственнай киин), И.Г. Тимофеев аатынан Майатааҕы лицей, быйыл Майаҕа арыллыбыт медицинскэй колледж салаатын устудьуоннара кэлэн эмиэ кыттыыны ыллылар. Социальнай политика управленията уонна өрөспүүбүлүкэтээҕи психологическай Киинтэн психолог кыргыттар кэлэннэр дьоҥҥо-сэргэҕэ психологическай трениннэри, тестэри ыыттылар, ону тэҥэ улууспутугар бигэргэтиллибит анал байыаннай дьайыы кыттыылаахтарын ийэлэригэр дастабырыанньаларын уһатыыга, уһатан саҥаны биэрэргэ көмөнү оҥордулар. Түгэнинэн туһанан күндү биир дойдулаахтарбытыгар, оскуолаларбытыгар, уһуйааннарбытыгар, тэрилтэлэрбит үлэһиттэригэр, урбаанньыттарбытыгар, анал байыаннай дьайыы буойуттарын дьиэ кэргэттэригэр улахан махталбытын тириэрдэбит. Куруук бу курдук бары түмсүүлээхтик, бэйэ-бэйэбитин өйөнсөн бииргэ сылдьыаххайыҥ диэн баҕа санаабын этэбин.
Аахсыйа түмүгүнэн, Майа урбаанньыттарыттан уопсайа 50 киһи – 511600 солк., 31 кыттыыны ылбыт тэрилтэлэр – 1967239 солк., аахсыйаҕа биирдиилээн дьон, общественнай холбоһуктар, түөлбэлэр, бэтэрээннэр – 159100 солк. киллэрдилэр. Хас биирдии киһи, хас биирдии тэрилтэ бу уопсай дьыалаҕа кыттыһан, бэйэтин дойдуһа тыынын уонна түмсүүтүн көрдөрдө. Хомуллубут көмө, үп-харчы, мал-сал чугастыы кэмҥэ АБДь зонатыгар тиэрдиллиэҕэ. Бу харчынан эбэтэр мал-сал көмөтүнэн эрэ муҥурдаммат, бу уолаттарбыт санааларын күүһүрдэр, төрөөбүт дойдулара кинилэри умнубатын, өрүү күүтэр уонна өйүүрүн көрдөрөр дьоһуннаах бэлиэ. Биһиги уолаттарбыт кыайыыны ситиһэн, этэҥҥэ дойдуларыгар кэлэллэрин баҕарабыт!
Лилиана Слепцова, Нюргуяна Васильева, Лида Кириллина, 10 кылаас үөрэнээччилэрэ,
«Мэҥэбил” медиа киин, В.П. Ларионов аатынан Майа орто оскуолата, Мэҥэ Хаҥалас