Мэҥэ-Хаҥалас улууһун Төхтүрүгэр Моҕоллой сайылыкка өрөспүүбүлүкэтээҕи ыанньыксыттар күрэхтэрэ ыытылынна. 25-с төгүлүн ыытыллар Саха сирин тыатын хаһаайыстыбатын үлэһиттэрин сомоҕолуур бэлиэ тэрээһин XX үйэ ыанньыксыт-рекордсмена Павел Шарин үбүлүөйдээх 70 сааһыгар уонна биирдии ынаҕыттан 6000 киилэ үүтү ыан чаҕылхай рекордун олохтообута 40 сылыгар ананар.
Арассыыйа Үлэҕэ Дьоруойдара Михаил Николаевич Готовцев уонна Владимир Африканович Михайлов бэйэлэринэн кэлэн кыттыыны ылбыттара, тэрийээччилэргэ уонна күрэхтэһээччилэргэ бэйэлэрин тус санааларын этэн, сүбэлэрин-амаларын үллэстибиттэрэ тэрээһини өссө үрдүк суолталаан биэрдэ. «Кэскил» эдэр кэрэспэдьиэннэрэ икки Үлэ Дьоруойун кэпсэтэр үрдүк чиэскэ тигистилэр.
Михаил Николаевич юнкордары кытары
Михаил Николаевич Готовцев Уус Алдан улууһун «Удьуор» бааһынай хаһаайыстыбатын баһылыга, Бүтүн Арассыыйа үрдүнэн үрдүк таһаарыылаах килбиэн үлэтин, төрөөбүт улууһун, өрөспүүбүлүкэтин аатын ааттаппыт «Үлэ Албан аата» уордьан толору кавалера, РФ Үлэҕэ Дьоруойа билигин 80 хаарыгар сылдьар. Кини билигин даҕаны ынаҕы ыыбын диэн биһигини сөхтөрдө.
— Мин оскуола кэнниттэн, «оскуола-производство-үрдүк үөрэх» диэн партия ыҥырыытынан үлэбин саҕалаабытым. Ийэм Готовцева Аграфена Михайловна үйэтин-сааһын тухары ыанньыксыт этэ. Уруккута «Бартыһаан Дьөгүөрэп» колхуос үлэһитэ. Ийэм үлэҕэ сыһыанынан, тулуурунан, дьулуурунан, кыайыгаһынан миэхэ холобур буолан, кыра сааспыттан сүөһү иитиитин үлэтигэр сыстаҕаспын. Ыанньыксытынан 1966 сыллаахтан Табалаах ферматыгар үлэлээн саҕалаан, күн бүгүнүгэр диэри үлэлии сылдьабын. Сүөһү үлэтиттэн атыны билбэппин. Киһини тардар үлэ. Ынах боруодатын тупсарыытыгар племенной, селекционнай үлэни эмиэ ыытан кэллим. Тыа хаһаайыстыбатыгар үлэлии сылдьар ыччакка таһаарыылаах үлэни, Саха сиригэр сүөһүттэн ылар бородуукусуйаны лаппа үрдэтиэхтэрэ диэн эрэллээхпин уонна үлэлэригэр бэриниилээх буолалларыгар баҕарабын, — диэн таһаарыылаах үлэтинэн төрөөбүт Тандатын, Уус Алдан улууһун, Сахабыт сирин киэҥ ыырга ааттаппыт туруу үлэһит киһи Михаил Николаевич Готовцев баҕа санаатын тиэрдэр.
Владимир Африканович Михайлов РФ Үлэҕэ Дьоруойа ыанньыксыттар күрэхтэригэр Сунтаар улууһун «Кириэстээх» СХПК халыҥ хамаандатын илдьэ кэлбит. Биһиги: «Үлэҕэ ситиһии төрдө тугуй?» диэн ыйытыкпытыгар: «Үлэни таптыахха наада, үлэни өрө тутуохха! Үлэттэн дьоллоноҕун, үлэни үлэлээтэххинэ, туох барыта иннин диэки баран иһэр», — диэн кини хоруйдаата.
— Мин санаабар, тыа хаһаайыстыбатыгар ыччат үлэлии хаалбат биричиинэтэ, үчүгэй дьиэ-уот, үчүгэй хамнас, үлэлиир усулуобуйа суоҕа, ол барыта баар буоллаҕына эрэ, ыччат үлэлиэ этэ. Холобур, үөрэҕи бүтэрэн баран, сорох оҕолор үөрэммит идэлэринэн үлэлээбэккэ, атын эйгэҕэ үлэлииллэр. Бу эмиэ сыыһа дии саныыбын. Мин 1970-c сыллартан үлэлиибин, тохтоло суох 55 cыл ыанньыксытынан үлэлээн кэллим. Билигин сааһым 73-һүм. Өссө да үлэлиир санаалаахпын. Үлэни өрүү өрө тутабын, үлэнэн олоробун. Үөлээннээхпин Павел Петровичтыын бииргэ үлэлээбит, алтыспыт киһим, бииргэ күрэхтэһэн, мин 4000 кг үүтү ыан, кини 6000 кг үүтү ыан рекорд олохтообута, — диэн кэпсиир билигин даҕаны үлэ үөһүгэр сылдьар Владимир Африканович Михайлов. Кини билигин күҥҥэ 45 ынаҕы ыырын уонна күннэтэ 18-20 киилэ үүтү биир ынахтан ыларын этэн биһигини эмиэ соһутта уонна сөхтөрдө.
Үлэ Дьоруойдарын кытары кэпсэтиибитин видеоҕа көрүҥ:
Алгыс ПОПОВ.
Видеоҕа уһулла, таҥна Надежда СМЕТАНИНА.
Төхтүр орто оскуолатын эдкордара, Мэҥэ Хаҥалас.
keskil14.ru