Улуу Кыайыы 81 сылынан З.А.Тихонова аатынан "Түөлбэ" куруһуоктарын үөрэнээччилэрэ тыыл бэтэрээнин Роза Макаровна Миронованы эҕэрдэлээн кэллибит.Бу көрсүһүү олус сылаас истиҥ эйгэҕэ ыытылынна. «Спектр творчества «студия оҕолоро оҥорбут бэлэхтэрин — панно уонна истиҥ махтал тыллардаах уруһуйдардаах открытка туттардыбыт. Биһиги эҕэрдэбит — аҕа көлүөнэлэр тыйыс сэрии сылларыгар оҥорбут хорсун быһыыларын иһин кыра махтал бэлиэтэ буолар.
Көрсүһүүгэ Роза Макаровна сэрии ыарахан кэмигэр оҕо сааһын туһунан кэпсээнин долгуйан туран иһиттибит. Кини 6 саастааҕар тулаайах хаалан, детдомҥа иитиллэн улааппыт. Сэрии кэмигэр, тыылга улахан дьону кытта бииргэ, ыарахан үлэни үлэлииллэрэ. Кыайыы буолбут күнүн туһунан кэпсээнэ киһи дууһатын дириҥник таарыйда.
Билигин сиэттэрэ анал байыаннай дьайыыга төрөөбүт дойдуларын чиэһин көмүскүү сылдьалларын туһунан хаартыскаларын көрдөрөн сэһэргээтэ. Кини биһиэхэ кыһамньыбыт, сылаас тылларбыт, бэлэхтэрбит иһин олус үөрдэ уонна махтанна. «Кытаатан үчүгэйдик үөрэниҥ, дойдугут историятын үөрэтиҥ, эйэлээх олоҕу сыаналыырга уонна төрөөбүт дойдубут туһугар үөрэхтээх киһи буолан тахсыҥ»- диэн алгыс тылларын үллэһиннэ.
Биһиги Роза Макаровнаҕа кытаанах доруобуйаны, сэргэхсийиини, уһун үйэни баҕардыбыт. Сайын үлэлиир лааҕырбытыгар кэлэн күнду ыалдьыт буолаар диэн ыҥырдыбыт.
Маннык көрсүһүүлэр олус суолталаахтар диэн бэлиэтиибин. Көлүөнэлэр тыыннаах сибээстэрин көрдөрөр, аҕа саастаах дьоннорбутун ытыктыырга, махталга үөрэтэллэр. Бу сырыыбыт көннөрү эҕэрдэ эрэ буолбакка, патриотизм, киһи буолуу дьиҥнээх уруога буолла. Биһиэхэ Кыайыы ханнык сыананан ылыныллыбытын дириҥник өйдүүргэ кыаҕы биэрдэ.
Түгэнинэн туһанан бары сэрии, тыыл бэтэрээннэригэр кытаанах доруобуйалаах, чэгиэн-чэбдик буолалларын баҕарабыт! Кыайыыны оҥорбут дьоҥҥо барыларыгар үйэлээх өйдөбүнньүк, албан аат!
Эрсан Петров, 8 кылаас,»Кыраайы үөрэтэр» куруһуок, З.А.Тихонова аатынан «Түөлбэ» оҕо Киинэ, Нам сэлиэнньэтэ, Нам улууһа