Самаан сайыҥҥыт хайдах саҕаланна, оҕолоор? Кыһыны быһа уһуннук утуйуохпут диэн ыраламмыт баҕс санааҕытын толорон тото утуйан, сынньанан туох эрэ туһалааҕынан дьарыктаммыт киһи диэн санаа үөскээбитэ буолуо.
Оттон мин бииргэ үөрэнэр доҕотторум бэс ыйын 18-тан олохтоох сылгыбыт собуотун сүөһү ферматыгар үлэлэрэ саҕаламмытын истэн ол туһунан ыйыталастым.
Сайаана Созонова: «Мин ыанньыксыт көмөлөһөөччүтүнэн үлэлиибин. Сайын аайы ийэбэр көмөлөһөөччүнэн алтыс кылаастан ыла үлэлиир буолан ыарырҕаппаппын, барытын билэбин уонна сатыыбын. Үлэбит сарсыарда алтаттан саҕаланар. Куйаас күн бырдахтаах буолар оннук күн ыарахан. Тыаллаах, сөрүүн күннэри күүтэччибин. Ол да буоллар үлэбин олус сөбүлүүбүн.»
Аполлон Винокуров: » Мин быйыл бостуук көмөлөһөөччүтүнэн үлэлииргэ кэпсэттим. 70-ча ынаҕы көрөбүт. Күҥҥэ иккитэ ыаныллаллар, онно үүрэн аҕалабыт уонна төттөрү мэччирэҥнэригэр илдьэбит. Бырдахха сүөһү көрөр олус ыарахан. Бырдахха сүөһүнү сынньатар, мэччирэҥнэригэр аһатар сыаллаах түптэ оттобут. Манна уоттан сэрэхтээх буолууну тутуһабыт. Сарсыарда эрдэттэн үлэбит саҕаланар. Киэһэ хойут бүтэбит. Быйыл саҥа үлэлээтим. Үлэм ыарахан соҕус да буоллар, сөбүлээтим. Эһиил да киириэм этэ.»
До5отторум сыралаах үлэҕэ киирэн сөбүлээн туран үлэлииллэр эбит. Маннык сайыҥҥы кэмҥэ үлэ оҕоҕо эбии харчыны эрэ буолбакка, олоххо наадалаах буолар уопуту, умнуллубат кэрэ түгэннэри бэлэхтиир.
Күнү быһа дьиэҕэ телефон тутан олорордооҕор сибиэһэй салгыҥҥа үлэлии-хамсыы, туһалааҕынан дьарыктана сылдьар быдан ордук буоллаҕа. Ким үлэлиир ол өйдүүн-санаалыын улаатар, сайдар, күүстээх, билиилээх, тулуурдаах буолар.
Сааскылаана Бубякина, 9 кылаас, Өлөөқө-Күөл, Орто Халыма