Ыам ыйын 26 күнүгэр Афанасий Петрович Илларионов аатынан Хайахсыт орто оскуолатыгар үөрүүлээх уонна долгутуулаах күн буолан ааста – Тиһэх чуораан тыаһаата. Бу күн оскуола эркинин иһигэр элбэх сыл билиини-көрүүнү ылбыт, доҕордоспут, кыһалҕаны кыайбыт, кэрэ түгэннэри үллэстибит үөрэнээччилэрбитигэр – 11-с кылаас оҕолоругар – улахан олох аартыга аһылынна.
Быйыл биһиги оскуолабытын үс нарын-намчы кыталык кыргыттар бүтэрэллэр: Комила Аржакова, Изольда Харлампьева, Юлиана Винокурова.
Таһырдьа төһө да тымныы, ардахтаах буоллар оскуолабыт аактабай саалата истиҥ эҕэрдэлэринэн, үөрүүнэн туолла. Үгэс быһыытынан, сыл аайы выпускниктарга киэҥ туттар биир дойдулаахтарбыт ааттарынан анал бриэмийэлэри туттараллар. Ол курдук быйыл Комила Аржакова Афанасий Петрович Илларионов аатынан «Бастыҥ үөрэнээччи» бириэмийэ лауреата буолла. Изольда Харлампьева Илья Петрович Марков аатынан «Бастыҥ спортсмен» бириэмийэни тутта. Юлиана Винокурова Михаил Дмитриевич Климов аатынан «Бастыҥ үөрэнээччи» бириэмийэ лауреатын үрдүк аатын ылла.
Үтүө үгэс сиэринэн, сыл ахсын хайа баҕарар хайысхаҕа талааннаах выпускниктарга нэһилиэкпит меценаттара бэйэлэрин ааттарыттан стипендиялары туттартаатылар. Ону таһынан «Навигаторы детства» ресурснай киин, тапталлаах «Кэскил» медиа оскуолабытыттан уонна Чурапчы улууһун үөрэҕин управлениетыттан Махтал суруктары туттулар. Элбэх истиҥ тыллар, баҕа санаалар этилиннилэр. Мин эмиэ кинилэр кэккэлэригэр «Эрэл» оҕо хамсааһынын президенэ буоларым быһыытынан, тэрилтэм аатыттан эҕэрдэ тылбын эттим уонна бэйэбит оҥорбут сэмэй бэлэхпитин туттардыбыт.
Выпускниктар оскуолаҕа үөрэнэр сылларын тухары үөрэппит-такайбыт, сылаас, истиҥ сыһыаннарын анаабыт учууталларыгар ис сүрэхтэриттэн махтаннылар. Мустубут ыалдьыттар бары Тиһэх чуораан вальсыгар уйдардылар. Бу үтүө күн алтан чуораан тиһэх тыаһынан уонна минньигэс тортунан түмүктэннэ.
Мин тус бэйэм санаабар, Тиһэх чуораан оскуолаттан арахсыы эрэ буолбакка, саҥа олох, саҥа кыах аартыгын арыйыы бэлиэтэ. Выпускниктарбытыгар баҕарыам этэ баҕа санааларын эрэллээхтик ситиһэллэригэр, саҥа суоллартан хаһан да куттаммакка, куруук бэйэлэригэр итэҕэйэллэригэр. Устудьуон олохторо чаҕылхай кыайыыларынан, истиҥ санаалаах доҕотторунан, дьоллоох түгэннэринэн туоллун.
Чуолаан чугас дьүөгэбэр Комилаҕа махталым муҥура суох. Махтанабын эйиэхэ куруук аттыбар сылдьыбыккын иһин. Эн миигин мэлдьи өйүүрүн, истэрин, көмөлөһөрүн, көннөрү күннэрбин сырдык оҥорорун. Куруук истиҥник үөрэр киһи баара төһө суолталааҕын өйдүүр кыахтанным.
Эйигин кытта бииргэ үлэлээбит кэммэр элбэх сырдык, сылаас өйдөбүл хаалла. Дьэ, онно мин эйигиттэн элбэххэ үөрэммитим. Эйиигин кытта холкутук сылдьыахха сөп. Эйиигинниин санаабын, ситиһиилэрбин үллэстэрбин сөбүлүүбүн. Тоҕо диэтэххэ, мин билэбин, эн хайаан да өйдүөҕүҥ уонна өйүөҕүҥ.
Мин доҕордоһуубутун олус сыаналыыбын. Баҕарабын эйиэхэ эксээмэннэргин ситиһиилээхтик туттараргар, баҕарбыт үөрэххэр киирэргэр, дьон киэн туттар киһитэ буоларгар. Туохтан да толлубакка иннин диэки баран ис.
Лилия МАРКОВА, IX кылаас,
А.П. Илларионов аатынан Хайахсыт орто оскуолата, Чурапчы