«Бэлэм буол» хаһыат 1990 сыл олунньу 13 күнүнээҕи нүөмэригэр «Володя Ульянов дневнигэр» Уус Алдан улууһун Лөгөй орто оскуолатын VII кылааһын туйгун үөрэнээччитэ Маша Нафанаилова 130-с нүөмэринэн киирбит.
Эмиэ бу сыл «Бэлэм буол» хаһыат атырдьах ыйын 25 күнүнээҕи нүөмэригэр «Саҥа үөрэх дьылыттан тугу күүтэбит?» диэн ыстатыйа бэчээттэммит. Онно Уус Алдантан Маша Нафанаилованы И. Алексеева түһэрбит хаартыската баар. Маша туһунан маннык суруйбуттар: «Хаһыаты өрүү ааҕааччылар Маша Нафанаилова ыстатыйаларын көрөр буолуохтааххыт. Кини туйгун үөрэнээччи, хаһыаты, сурунаалы, кинигэни таптаан ааҕар. Маша бэркэ сынньанан аны оскуолатыгар барар күннэрин күүтэр».
«Бэлэм буол» хаһыат оччотооҕу юнкора Маша Нафанаилова билигин түөрт оҕолоох улахан дьиэ кэргэн ийэтэ, тапталлаах кэргэн, киһи уйулҕатын үөрэтэр, киһи өйүн-санаатын сааһылыыр үрдүк үөрэхтээх психолог, бу уустук идэҕэ эдэр дьону уһуйар учуутал, психология билимин хандьыдаата.
Мария Семеновна Нафанаилова оҕо сылдьан сөбүлээн аахпыт хаһыатын ааҕааччыларыгар, уйулҕа үөрэхтээҕин быһыытынан, 2026-2027 саҥа үөрэх дьылын көрсө сүбэтин-аматын тиэрдэр.
– Күндү, «Кэскил» («Бэлэм буол») хаһыат ааҕааччылара! Аҕыйах хонугунан саҥа үөрэх дьыла саҕаланыаҕа. Эһиги оскуолаҕытыгар үөрэ-көтө барарга бэлэмнэнэ сылдьар буолуохтааххыт. Ким эрэ «оо, эмиэ оскуолаҕа барабыт дуо» диэн, баҕар, сүрэҕэлдьиирэ буолуо, ким эрэ саҥа оскуолаҕа киирээри эбэтэр саҥа үөрэх дьылын саҥа оскуолаҕа көрсөөрү долгуйара, куттанара да буолуо.
Долгуйаргыт, куттанаргыт, оскуолаҕа бараргыт чугаһаабытыттан сүрэҕэлдьиир курдук сананаргыт оруннаах. Сайыҥҥы уһун сынньалаҥ кэнниттэн үөрэх биир ситимигэр киирэр, кырдьык, чэпчэкитэ суох. Онуоха киһи бэйэтин ис туругун, өйүн-санаатын бэлэмнээн, сааһыланара ордук. Балаҕан ыйын бастакы күнүгэр оскуолаҕа үөрэ-көтө, чэпчэкитик тэринэн барарга эрдэттэн бэлэмнэниҥ. Аан бастаан күннээҕи режимҥитин сааһыланыҥ. Киэһэ сөпкө утуйан, сарсыарда сөпкө туран, эккитиҥ-сииҥҥитин, өйгүтүн-санааҕытын сааһылаан оскуолаҕа үөрэнэ барар бириэмэҕитинэн сөптөөхтүк хайысхалаан биэриҥ.
Быйылгы үөрэх дьылыгар бэйэҕитигэр эппиэтинэскитин үрдэтэр сорукта туруоруҥ. Бириэмэҕитин сөпкө аттаран, былааннаан, оскуолаҕа бэйэҕит тэринэн, хомунан барарга үөрэниҥ. Уустуктары көрүстэххитинэ, соҕотоҕун туран хаалымаҥ: чугас дьонноргутуттан, доҕотторгутуттан, учууталларгытыттан сүбэлэттэриҥ.
Оскуола оҕону ааҕарга, суоттуурга, диктант эрэ суруйарга үөрэтэр буолбатах. Оскуолаҕа оҕо бэйэтин көрүнэргэ, бэйэтин олоҕор эппиэтинэһи ылынарга, олоҕун былаанныырга үөрэнэр. Көрдөххө, судургу курдук эрээри, бу бүтүн инники олоххор тирэх буолар улахан күүс-көмө.
Саҥа үөрэх дьылыгар барыгытыгар ситиһиилэри баҕарабын.
кэскил14.ру