От ыйын 4-5 күннэригэр Кэбээйи улууһугар Кэбээйигэ Олоҥхо Ыһыаҕа ыытылынна. Бастакы күҥҥэ «Оҕо түһүлгэтэ» олоҥхо былаһаакката үөрүүлээхтик арылынна. Ыытааччыларынан Афоня Афонскай уонна Виолетта Левина, Кэбээйи орто оскуолатын выпускниктара, буоллулар. Күрэх дьүүллүүр сүбэлэрэ: Сииттэ орто оскуолатыгар өр сылларга директорынан үлэлээбит, учууталлар учууталлара Ольга Дмитриевна Левина, В.Е.Колмогоров аатынан Сииттэ орто оскуолатын директора Андрей Викторович Новгородов уонна Сииттэ нэһилиэгин көхтөөх ыччата Гаврил Геннадьевич Слепцов.
Күрэх түөрт түһүмэхтэн турар. Ол курдук, бастакы түһүмэх — Бэйэни билиһэннэрии. Иккис түһүмэх — Өбүгэбит сиэрин-туомун билиигэ викторина. Үһүс түһүмэх — Дьиэ кэргэним ытык мала. Төрдүс түһүмэх — Дьиэтээҕи сорудах өбүгэ оонньуутун бэлэмнээн кэлэн көрөөччүлэри, күрэх кыттааччыларын оонньотоллор. Бу түһүмэххэ кыттааччылар төһө элбэх киһини оонньотоллоро учуоттанар. Ол курдук, элбэх оонньуу ыытылынна уонна оҕолор олус көхтөөхтүк оонньоотулар, кытыннылар.
Бу былаһаакка иһинэн «Оҕо олоҥхотун балаҕана» эмиэ көхтөөхтүк ыытылынна. Барыта республикабыт араас муннуктарыттан 49 кыттааччы күөн көрүстэ. Холобура: Дьокуускайтан, Горнай, Нам, Кэбээйи, Мэҥэ Хаҥалас, Уус-Алдан уонна атын улуустартан.
Олоҥхо Ыһыаҕын иһинэн араас тэрээһиннэр ыытылыннылар. Ол иһигэр Саха норуотун оонньуулара, Оһуохай күрэҕэ буолан аастылар. Оттон от ыйын 5 күнүгэр оҕо түһүлгэтигэр сахалыы мода күрэҕэ ыытылынна. Оҕолору хас да номинациянан үллэрэн кытыннардылар. Соҕотохтуу кыттыыга уопсайа 16 оҕо кытынна, онтон уопсай кыттыыга 10 оҕо кытынна. Кыайыылаах оҕолору харчылаах сертификатынан хааччыйдылар, үрдүк чыпчаал кыайыылаахтар билиннилэр.
Фольклорбут биир чыпчаала Олоҥхо эдэр ыччакка уонна чуолаан оҕолорго бу курдук тарҕанан, кэҥээн иһэрин баҕарабын. Бэйэм олоҥхону истэн олус дуоһуйдум уонна кырачаан оҕолортон сөҕө-махтайа санаатым.
Марина Попова, Олеся Неустроева, Кэбээйи орто оскуолатын 9 кылааһын үөрэнээччилэрэ, эдэр кэрэспэдьиэннэр,
Видеоҕа уһулла, таҥна Кирсан Кириллов, Бэрдьигэстээх орто оскуолатын 9 кылааһын үөрэнээччитэ, эдэр кэрэспэдьиэн