Бүгүн, ыам ыйын 22 күнүгэр, Ньукуолун күнүн көрсө, саха суруналыыстыкатын саарына, айылҕаттан айдарыылаах суруйааччы, бэчээт дьыалатын тэрийээччи, суруналыыс ыччаты уһуйааччы, “Эдэр саас”, “Саха санаата”, “Орто дойду” хаһыаттары, “Саха саргыта” альманааҕы тэрийбит редактор, уопсастыбаннай-бэлитиичэскэй диэйэтэл — Иван Петрович Ушницкай төрөөбүтэ 65 сылыгар аналлаах «Ньургуһун ыллыга» үөрүүлээх тэрээһин Ус Хатын Кумахтаах диэн сиригэр-уотугар ыытылынна.
Ыам ыйын 18 кунэ — Сахабыт сиригэр Ньургуһун күнүнэн биллэриллибитэ, бу күнү үтүө үгэс гына олоххо киллэрэргэ биллиилээх общественнай деятель, СӨ култууратын үтүөлээх үлэһитэ, Арассыыйа суруйааччыларын, суруналыыстарын сойууһун чилиэнэ — Иван Петрович Ушницкай аан маҥнай көҕүлээбитэ.
Тэрээһин арыллыыта алгыс сиэриттэн-туомуттан саҕаланна. Алгыыр алгысчытынан олоҥхоһут, “Ытык олоҥхоһуттар” түмсүү салайааччыта Валентин Гаврильевич Исаков буолла.
Саха суруналыыстыкатын саарына, чаҕылхай талааннаах суруналыыс, суруйааччы, уопсастыбаннай-бэлитиичэскэй диэйэтэл, Саха АССР Үрдүкү Сэбиэтин 12-с ыҥырыытын дьокутаата, Саха комсомолун лауреата, В.В. Никифоров-Күлүмнүүр аатынан суруналыыстыка салаатыгар Саха Өрөспүүбүлүкэтин судаарыстыбаннай бириэмийэтин лауреата, Саха Өрөспүүбүлүкэтин культуратын үтүөлээх үлэһитэ, Саха Өрөспүүбүлүкэтин бэчээтин уонна ыччакка политикатын туйгуна, Уус Алдан улууһун уонна Дүпсүн нэһилиэгин Нам улууһун Хатырык нэһилиэгин бочуоттаах гражданина, “Центральное дело” “Ойууттар, удаҕаттар”, “Сахаачча, Сахаачча”, “Өй уонна күүс: тулуур уонна дьулуур” кинигэлэр, сонун бырайыактар ааптардара, Ньургуһуҥҥа сүгүрүйүүнү көҕүлээбит — Иван Петрович Ушницкай төрөөбүтэ 65 сылыгар анаан Арктикатааҕы эпос уонна искусство киинэ, “Сахабэчээт” Саха Өрөспүүбүлүкэтин судаарыстыбаннай автономиялаах тэрилтэтэ, Тулагы нэһилиэгин дьаһалтата уонна Тулагытааҕы Мария Петровна Эверстова-Обутова аатынан культура киинэ кыттыһан тэрийиилэринэн “Ньургуһун ыллыгынан» дьоро түһүлгэтэ төрүттэннэ.
Бүгүҥҥү дьоро күҥҥэ Арктикатааҕы эпос уонна искусство киинин директорын солбуйааччыта Герман Олегович Григорьев, Арктикатааҕы эпос уонна искусство киинин бырайыактыыр программаларын салаатын салайааччыта Изабелла Игнатьевна Николаева, Саха Өрөспүүбүлүкэтин культураҕа уонна духуобунай сайдыыга министрин солбуйааччыта Ирина Александровна Кобзева, «Сахабэчээт” судаарыстыбаннай автономиялаах тэрилтэ генеральнай директорын солбуйааччыта Ольга Ивановна Семенова, Тулагы нэһилиэгин дьаһалтатын баһылыга Егор Гаврильевич Попов уонна Иван Петрович Ушницкай бииргэ төрөөбүт эдьиийэ, Саха Өрөспүүбүлүкэтин культуратын туйгуна Александра Петровна Ушницкая алгыс тылларын эттилэр.
2026 сыл Арассыыйа үрдүнэн сомоҕолоһуу сылынан биллэриллибитэ. Күндү биир дойдулаахтарбыт, бу курдук өрүү түмсүүлээх буолуохха, биир сомоҕо буоламмыт кыаллыбаты кыайыахха! Төрөөбүт дойдубут сириттэн күүс ылан, Ньургуһун кэриэтэ тоҥ хаары тобулан үүнэ, сайда, чэчирии туруохха!