Сэтинньи 6 күнүгэр, Мэҥэ Хаҥалас Дьабыыл нэһилиэгин Арыылаах эбэтигэр, үтүө үгэскэ кубулуйбут улуус Аҕа баһылыга Дмитрий Иванович Тихонов көҕүлээһининэн ыытыллар улуус үөрэнээччилэрин «Муҥха — 2026» тэрээһинэ буолан ааста.
Тэрээһиҥҥэ 12 оскуолаттан 140 оҕо кыттыыны ылла.
Мэлдьэхси орто оскуолатыттан 9 уол, оскуола дириэктэрэ Кирилл Дмитриевич салайааччылаах муҥхаҕа көхтөөх кыттыыны ылан кэллибит.
Бу тэрээһин кэнчээри ыччаты айылҕаҕа сыһыарыыга, төрүт дьарыкка уһуйууга, холкутук уонна дьулуурдаахтык үлэлииргэ туһуланна. Оҕолор балыктааһын кистэлэҥнэрин биллилэр, айылҕаны харыстыырга үөрэннилэр. Биир дойдулаахтарбыт муҥхаҕа түмсүүлэрэ, күүстэрин холбоон, саха омук ытык үгэһин салҕыырга көҕүлүүр.
Тэрээһини хаһыс да сылын көҕүлээн тэрийэр улуус аҕа баһылыгар Дмитрий Тихоновка, улуус администрациятыгар, үөрэх салалтатыгар улахан махталбытын тиэрдэбит.
Арылхан Сокольников, 10 кылаас, «Үктэл» медиа-киин, А.В. Чугунов аатынан Мэлдьэхси орто оскуолата, Мэҥэ Хаҥалас