Муус устар 10 күнүгэр Ньурба улууһун Марха орто оскуолатыгар олус долгутуулаах, үөрүүлээх күн буолан ааста. Аан бастакытын ыытыллыбыт улуустааҕы метатурнир биһиги оскуолабытыгар буолан ааста. Бу тэрээһиҥҥэ Марха, Киров, Акана уонна Хаҥалас орто оскуолаларын хамаандалара кэлэн, бэйэлэрин билиилэрин, сатабылларын тургуттулар.
Күрэҕи «Хатыҥ-Сыһыы ымыылара» фольклорнай ансаамбыл (салайааччы Н.Б. Семенов-Куорсун) бэйэтин кэрэ ырыатынан-тойугунан арыйда.
Метатурнир үс түһүмэҕинэн ыытылынна: 1) «Бэйэни билиһиннэрии»: Хамаандалар бэйэлэрин билиһиннэрдилэр.
2) «Олимпиада сорудаҕа»: Бу түһүмэххэ салайааччылар оҕолорго нуучча, саха уонна омук тылларынан ыарахан, интэриэһинэй сорудахтары толордулар. Оҕолор билиигэ тардыһыылара, түргэн өйдөөхтөрө бу түһүмэххэ толору көһүннэ.
3) «Культурный код моего наслега»: Видео устуутун түһүмэҕэ. Бу түһүмэххэ хамаандалар бэйэлэрин нэһилиэктэрин историятын, култууратын, сиэр-туом, айылҕа кэрэтин хайдах харыстыылларын уонна ытыктыылларын көрдөрдүлэр.
Тыҥааһыннаах, дьулуурдаах киирсии түмүгүнэн Кылаан кыайыылааҕынан — Акана орто оскуолата ааттанна. Иккис миэстэни — Марха орто оскуолата ылла. Үһүс миэстэ — Хаҥалас оскуолата ылла.
Бары кыттааччыларга, салайааччыларга дириҥ махталбытын тиэрдэбит. Бу курдук таһымнаах тэрээһиннэр оҕолор билиилэрин хаҥатан, доҕордоһуу ситимин күүһүрдэр, төрөөбүт тылга, дойдуга тапталы иҥэрэр. Инникитин даҕаны маннык тэрээһиннэр элбии туралларыгар баҕарабыт!
Элла МОСТАХОВА, Саша ФЕДОРОВ,
11 кылаас үөрэнээччилэрэ, «Уткин сонуннара» медиа-киин юнкордара.
Кэскил14.ру