«Үс өрүс тардыылаах Кэбээйигэ – Саха сирин тэбэр сүрэҕэр» — Олоҥхо ыһыаҕа.
От ыйын 4 күнүгэр, Кэбээйи нэһилиэгэр Саха сирин дьонун-сэргэтин түмэр, өбүгэ үгэһин үйэтитэр улуу бырааһынньыкпыт — Олоҥхо ыһыаҕын үөрүүлээх арыллыыта буолла. Быйылгы Олоҥхо ыһыаҕа Олоҥхо үһүс уон сылын арыйар бастакы улахан тэрээһининэн буолла.
Уһун Хонуу диэн сиргэ Руслан Тараховскай режиссердаах, Эдьиий Дора сүбэһиттээх айар кэлэктиип күнүстэри-түүннэри үлэлээн, Кэбээйи улууһун бары нэһилиэктэрин хабан туран, чаҕылхай көстүүнү бэлэхтээтилэр. Ыһыах арыллыытыгар оҕотуттан кырдьаҕаһыгар тиийэ 1000-тахса киһи кытынна.
Ыраахтан-чугастан сылдьыбыт дьон бэлиэтииринэн, быйылгы Олоҥхо ыһыаҕын тыына олус үрдүк уонна долгутуулаах. Дьон-сэргэ үөрэн-көтөн, кэрэни кэрэхсээн, Олоҥхо дойдутун хомуһуннаах эйгэтигэр толору ылларбыт. Хас биирдии көрөөччү устуоруйа эйгэтигэр умсан, кэрэ көстүүгэ дууһалыын манньыйбыт, сүрэхтэрэ дьикти тыынынан туолбут. Кэрэ көстүү алгысчыт Михаил Винокуров уонна кини арыалдьыт оҕолорун алгыһынан саҕаланна.
Кэбээйи улууһа киэн туттар Улуу эбэлэригэр анаммыт туруорууга, саха, эбээн норуота күөл иччитигэр, айылҕаҕа улаханнык сүгүрүйэллэрин ойуулаан көрдөрдулэр. Быйылгы ыһыах сонун көстүүтүнэн кыттааччы элбэҕэ, тыыннаах кулунчуктар, табалар, нэһилиэк аҕа баһылыктара аты миинэн киириилэрэ уонна Саха Сирин дыгыннара, Кэбээйи уолаттара Артем Дьяконов, Яков Дмитриев, Алексей Уваровскай буоллулар. Түмүккэ эйэ оһуохайа олохтоохтору уонна ыалдьыттары биир сомоҕо гына муста.
Олоҥхо ыһыаҕын сүрүн ыалдьыттарынан өрөспүүбүлүкэбит Ил Дархана Айсен Сергеевич Николаев уонна Судаарыстыбаннай Мунньах (Ил Түмэн) Бэрэссэдээтэлин бастакы солбуйааччыта Александр Николаевич Жирков буоллулар.
Ил Дархан Айсен Сергеевич Николаев бэйэтин алгыһын, эҕэрдэтин тиэрдэр:
Дьиҥ чахчы биһиги ыһыахпыт курдук дьону-сэргэни омугуттан, итэҕэлиттэн, сааһыттан тутулуга холбуур, сомоҕолуур бырааһынньык суох диэтэхпинэ сыыһыам суоҕа. Биһиги сахабыт Олоҥхото Аан дойду баай культуратыгар биир саамай чаҕылхай чыпчаала буолар. Махтаныам этэ бу ыһыаҕы киирсэн, сомоҕолоһон тэрийбит дьоҥҥо-сэргэҕэ.
Оттон Ыһыах чэрчитинэн барыта 40-тан тахса араас куонкурус-күрэх ыытыллыахтаах: олоҥхоһуттар, оһуохайдьыттар, тута хоһуйааччылар, тойуксуттар, ырыаһыттар, чабырҕахсыттар, күрэсчиттэр, о.д.а. күөн көрсүөхтээхтэр.
Онон тэрээһин үрдүк таһымнаахтык уонна дириҥ ис хоһоонноохтук ааспытыттан тус бэйэм эмиэ олус үөрдүм, киэн тутта санаатым.
Сиһилии видео-матырыйаалга көрүҥ:
Сайаана Терехова, 11 кылаас
Дьоҕур эдкорпост, Кэбээйи,
Святослав Барабанов, 10 кылаас, Нам, видеоҕа устуута уонна таҥыыта