Ыам ыйын 22 күнүгэр Дьаҥхаады нэиһилиэгэр Төхтүргэ хонууга күүрээннээх биэс хонуктаах үөрэх ситиһиилээхтик түмүктэннэ. Бу кылгас да буоллар, умнуллубат кэм устата эдэр ыччаттар өйдөрүн-санааларын тургутан, элбэх саҥа билиини-көрүүнү ыллылар.
Маннык дьарыктар сүрүн соруктара оҕолору байыаннай сулууспаҕа бэлэмнээһин, дойдуларын таптыыр, көмүскүүр дьону иитии, олоххо дьулуурдаах, тулуурдаах буоларга үөрэтии буолар. Биһиги уолаттарбыт уонна кыргыттарбыт кэлэр кэмҥэ дойдубут кэскилин, эйэлээх олоҕун хааччыйар буолуохтаахтар. Мунньах кэмигэр үөрэнээччилэр саллаат олоҕун кытта чугастык билистилэр. Кинилэр тактическай бэлэмнэниини, бастакы медицинскэй көмөнү оҥорууну, автомат ыһыытыгар, хомуйуутугар, сөпкө туттарга үөрэннилэр.
Ону таһынан, физическэй сайдыыга туһуламмыт спортивнай күрэхтэһиилэр, Төхтүрбүт кэрэ, ытык сирдэригэр киэн хонууларыгар, улахан Дылбаахы мырааныгар марш-бросоктар, күүс-уох дьарыктара буоллулар. Киэһэтин казарма иһигэр ырыа-хоһоон, историяҕа аналлаах кэпсэтиилэр ыытылыннылар, хорсун саха дьонун, сэрии геройдарын туһунан кэпсээннэр иһилиннилэр. Сэрии хорсун геройдарын холобурдарынан Ийэ дойдуга таптал, бэриниилээх буолуу өйдөбүллэрин иҥэриннилэр.
Оскуола үөрэнээччилэрэ хонууга дьарыкка күүһү-уоҕу, хорсун санааны көрдөрдүлэр. Биир хамаанда буолан үлэлээһиҥҥэ үөрэннилэр, саҥа доҕоттордоннулар. Хас биирдии кыттааччы бөҕөргөөн, элбэх билиини ылан, бэйэтигэр эрэлэ күүһүрэн дьиэтигэр төнүннэ.
Маннык үөрэх эдэр көлүөнэни чөл олоххо, дойдутугар бэриниилээх буолууга иитэр. Киһи быһыытынан сиппит-хоппут буола улаатарыгар улахан суолталаах. Кинилэр биһиги Сахабыт сирин, Арассыыйа кэлэр кэмин сайыннарыахтара. Үөрэх ситиһиилээхтик түмүктэммитинэн тэрийээччилэри, уолаттары эҕэрдэлиибит. Эйэлээх халлаан аннынан чэгиэн туруктаах, дьоллоох буолуоххайыҥ!
Алгыс ПОПОВ, Х кылаас, И.М. Романов аатынан
Төхтүр орто оскуолата, Мэҥэ Хаҥалас