Ыам ыйын 26 күнүгэр Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар улахан айаҥҥа атаарар алгыстаах чуораан чылыгырыы тыаһаата.
Тэрээһин саҕаланыытыгар экскурсовод оҕолор кэлбит ыалдьыттарга оскуолаларын билиһиннэрдилэр. Онтон аактабай саалаҕа тэрээһини салайан ыыппыт В.И. Дьяконова, В.В.Макарова чуор куоластарынан төрдүс кылаастары ыҥырдылар, кинилэр быйыл алын сүһүөҕү бүтэрэн, орто сүһүөххэ тахсалларын чиэстээһин буолла. Учууталлара Владилена Ильинична Винокурова оҕолорун ситиһиилэрин билиһиннэрдэ.
Онтон быйыл бастакытын судаарыстыбаннай тургутугу ааһар 9 кылаастары эҕэрдэлээһин буолла. Холбоһук директора Л.А. Афанасьева экзамеҥҥа киирии бирикээһин ааҕан иһитиннэрдэ. Тохсустары Ньургуйаана Алексеевна Уварова салайан кэллэ. Бу икки кылаас үөрэнээччилэригэр директор Махтал суруктары туттарда, кыра кылаастар ырыанан-хоһоонунан эҕэрдэлээтилэр, төрөппүттэр учууталларга махтаннылар.
Онтон 11 кылаас үөрэнээччилэрин хас биирдиилэрин ситиһиилэрин билиһиннэрии кэнниттэн учууталлар оҕолору сиэтэн сценаҕа таһаардылар. Эмиэ бирикээһи билиһиннэрии кэнниттэн олус элбэх араас таһымнаах грамоталары, бэлэхтэри туттарыы 2 чаас устата салҕанан барда. Оҕолор хас биирдиилэрэ махтанан, тыл эппиттэрэ олус долгутуулаах буолла. Учууталларга, оскуола үлэһиттэригэр тыыннаах сибэккилэри бэлэхтээтилэр. Бастакы учууталлара Светлана Романовна Винокурова оҕолоругар наһаа эрэнэрин туһунан, 7 сыл салайан илдьэ сылдьыбыт кылаастарын салайааччыта Кэрэчээнэ Егоровна Терентьева оҕолоругар экзамеҥҥа үрдүк ситиһиилэри баҕаран, тыл эттилэр.
11-тэр «Быраһаай оскуолам!» ырыаны ыллаатылар, оскуолатааҕы сыл доҕуһуола буолбут вальсы үҥкүүлээтилэр. Оҕолор оскуолаларыгар 15 тыһыынча харчынан бэлэх биэрдилэр. Салгыы үгэс буолбут «Кыһыл көмүс» выпустары көрсүү, чиэстээһин буолла. Бу күн Чымнаайыттан, Ытык Күөлтэн, Дьокуускайтан, Чычымахтан, Харбалаахтан 20 выпускник кэлэн, оскуоланы бүтэрээччилэри эҕэрдэлээтилэр, оскуола сайдыытыгар харчынан бэлэх туттардылар. Кинилэр ортоллругар Ил Түмэн дьокутаата Прокопий Дмитриевич Рахлеев, култуура бэтэрээннэрэ Светлана Очирова, Валентина Матвеева, бэтэрээн учуутал Феврония Попова, бастыҥ иитээччи Татьяна Мессеева, саҥаран-иҥэрэн салайбыт Александра Неустроева уо.д.а бааллар. Светлана Очирова кэрэ ырыатынан эҕэрдэлээн, сүргэбитин көтөхтө.
Онтон салгыы «Бүтэһик уруок» буолла. Бу уруогу ыалдьыттарбыт, бастакы учууталлара С.Р. Винокурова, кылаас салайааччыта К.Е. Терентьева олус долгутуулаахтык иилээн-саҕалаан ыыттылар.
Салгыы «Көмүс выпустары» кытта учууталлар сылаас чэйдээх остуол тула олорон, санаа атастастылар, ахтыылары иһиттилэр. Эппиэттээх күннэр үүннүлэр. Оҕолорбутугар ситиһиилэри баҕарабыт! БКЭ-ни этэҥҥэ ааһан, сөбүлүүр идэлэригэр үөрэнэ баралларыгар бүгүҥҥү этиллибит үтүө баҕа санаалар, алгыстар тирэх буоллуннар!
Валентина Кривошапкина, Харбалаах, Таатта.
Кэскил14.ру