Сахалыы тылынан кинигэлэри, араас туһалаах босуобуйалары, оонньуулары, эгэлгэ олус наадалаах матырыйааллары бэчээттээн, күннээҕи олохпут ис хоһоонун байытар, сайыннарар «Айар» кинигэ кыһата үйэлээх үбүлүөйүн бэлиэтиир тэрээһиннэрэ саҕаланна…
Күндү тапталлаах кыһабыт үлэһиттэрэ! Эһиги тэриллибиккит үйэлээх үбүлүөйүн бэлиэтиир үөрүүлээх күҥҥүтүнэн эҕэрдэлиибин! Эһиги айымньылаах үлэҕит төрөөбүт тылбыт үйэтэ уһууругар, сахалыы өй-санаа, толкуй туруктаах буоларыгар улахан төһүү күүс буолар!
Бу кэскиллээх тэрилтэни биир дойдулааҕым Август Васильевич Егоров сүрүн тирэх киһитэ биһиги бииргэ үөрэммит доҕорбут Валерий Николаевич Луковцевтыын бэркэ салайан үлэлэтэ олороллоруттан үөрэбин уонна киэн туттабын!
Бэйэҕит тула дьаныардаах, аныгылыы көрүүлээх эдэр дьону түмэн үлэлии олороргут үгүс саха дьонугар үтүө холобур буолар! Мин үлэбинэн да, бэйэм наадабар да элбэхтэ алтыһан кэлэктиип олус бэркэ түмсүүлээхтик үлэлиирин билэбин, хас да сыллааҕыта Айылыатта Дьырылыаты өйүүргэ, кинигэ ыытарга тыл көтөхпүппүн өйөөбүккүт, былырыын икки эмтэммит балыыһаларбар: кардиоцентрга уонна өрөспүүбүлүкэтээҕи эндокринологияҕа ыарыһахтар ааҕалларыгар диэн сахалыы кинигэлэри спонсордыырга көрдөспүппүн тута толорбуккутугар наһаа улахан махталлаахпын!
Саха сээркээн сэһэнньитэ Н.Е. Мординов-Амма Аччыгыйын «Сааскы кэм» арамаанын бастакы варианынан таһаарбыккытыгар нэһилиэкпэр, оҕолоох ыалларга спонсордар көмөлөрүнэн тарҕатарбар өйөбүл буолбуккутун куруук махталынан ахтабын! Өрөспүүбүлүкэ оҕолорун «Онус тоҕо?» айан суруйууларын көрдөһүүбүн ылынан, судаарыстыба суотугар бэчээттээбиккитигэр эмиэ наһаа махтанабын!
Ити курдук, саха тыллаах төрөөбүт тыла сүппэтин, сиэрэ-майгыта олохсуйарын туһугар дириҥ ис хоһоонноох билиҥҥи кэмҥэ олус тоҕоостоох үлэҕитигэр ситиһиилэри, сайдыыны баҕарабын!
Доҕоттоор, куруук «Айардыын» бииргэ буолуоҕуҥ!
Валентина Кривошапкина, Таатта, Харбалаах
Кэскил14.ру