Н.И. Прокопьев аатынан Хатыы орто оскуолата 2026-2027 сыллааҕы үөрэх дьылыгар үктэннэ. Оскуолабыт аанын үктэлин бары атыллаан үөрэнээччилэрбит да, учууталларбыт да бары уоттаах харахтаах саҥа үөрэх дьылыгар үктэннилэр.
Билии күнүн үөрүүлээх тэрээһинигэр Н.И. Прокопьев аатынан Хатыы орто оскуолатыгар улууспут баһылыга Алексей Михайлович Иннокентьев күндү ыалдьыт буолан кэлэн, маҥнайгы кылааска киирбит оҕолорго улуус дьаһалтатын аатыттан сэмэй бэлэҕин туттарда.
Бу күн оскуолабыт хатыҥ чараҥнаах олбуорун быыһыгар «Кэм Капсулата» диэн муннук арыллыытын бэлиэтээтибит. Бу манна биһиги оскуола саамай элбэх оҕолоох орто сүһүөххэ маҥнайыгытын үктэммит 5 кылаастары, улууспут аҕа баһылыгын уонна оскуолабыт дириэктэрин ыҥыраммыт, баҕа санааларын суруйтараммыт, саҥа «Кэм Капсулатын» саһыардыбыт. Бу капсулабыт 2031 сылга 5 кылаастарбыт бүтэһик чуорааннарын тыаһатар кэрэ кэмигэр арыллыаҕа.
2026-2027 сыллааҕы үөрэх дьылыгар Н.И. Прокопьев аатынан Хатыы орто оскуолатыгар 67 оҕо үөрэнэр. Маҥнайгы кылааска быйыл 8 оҕо оскуола боруогун атыллаан киирдэ, кинилэри билии-көрүү дойдутугар сирдээччинэн, бастакы учууталларынан Анастасия Семеновна Васильева ананна.
Кэлбит мааны ыалдьыттарбыт бары алгыс тылын оҕолорбутугар анаатылар, ону таһынан өр сылларга биһиги оскуолабытыгар физика предметын үөрэппит бэтэрээн учууталбыт Розалия Григорьевна Егорова куораттан кэлэн эҕэрдэ бастыҥын этэн аһарта.
«Эдэр учууталлар Хатыы орто оскуолатын хайаан да таптыыргытыгар уонна оҕолоргутун билиигэ-көрүүгэ сирдииргитигэр, бу Мэҥэдьэк нэһилиэгин, мин үлэлээн ааспыт дойдум диэн куруук өйдүү-саныы сылдьаргытыгар», — диэн баҕа санаатын эттэ.
Кырдьык даҕаны, бу үөрэх дьылыгар 4 эдэр эр киһи кылаас салайааччытынан ананан үлэлиэҕэ. Маны таһынан, оскуолабытыгар 20-чэ эдэр учуутал үлэлиир.
Агро оскуолабыт сонуннарыттан суруйан ылар буоллахха, бу үөрэх дьыла саҕаланыаҕыттан муостаахтарбытыгар кырыа кыһыммытын аһардаары хотон тутта сылдьабыт. Уонна онтон биир үөрүүбүт диэн быйыл бүтэрбит үөрэнээччилэрбит бары устудьуон аатын сүктүлэр.
Оҕолорбутугар уонна учууталларбытыгар баҕарыахпыт этэ дьолу-соргуну, үлэҕитигэр үөрэххитигэр үс төгүл ситиһиилэри!
Н.И. Прокопьев аатынан Хатыы агро хайысхалаах оскуолатын медиа-киинэ.
Мэҥэдьэк, Ньурба.
Кэскил14.ру