Россияҕа ахсынньы 9 күнүгэр Аҕа дойду Геройдарын күнэ бэлиэтэнэр. Сыл аайы бу күн төрөөбүт дойдутугар сулууспалаабыт уонна үрдүкү государственнай наҕараадаларынан бэлиэтэммит дьону чиэстииллэр. Ахсынньы 9 (сэтинньи 26 күнүгэр урукку стилинэн) 1769 сыллаахха императрица Екатерина II уурааҕынан Россия империятын үрдүкү байыаннай наҕараадатынан Сибэтиэй Георгий уордьана буолбута. Кыргыһыыга хорсун быһыыларын көрдөрбүт үрдүкү байыаннай чунуобунньуктарга туттараллара. Бүгүҥҥү бырааһынньык ааспыт кэм герой дьоммутун уонна ытык наҕараадаларга тиксибит билиҥҥи геройдары бэлиэтиир күммүт.
Бүгүҥҥү «Дьоһуннааҕы кэпсэтии» тиэмэтэ эмиэ бу күҥҥэ анаммыта. Тоҕо бу күн Аҕа дойду геройдарын күнэ бэлиэтэнэр буолбутун биллибит. Россия Геройдара анал байыаннай дьайыы кыттыылаахтара Владислав Головин, Родимир Максимов санааларын көрдүбүт-иһиттибит. Владислав Головин оҕо эрдэҕиттэн эппиэтинэстээх буола улааппыт, Родимир Максимов киһи герой буолан төрөөбөт, барыта бэйэҕиттэн тутулуктаах диэн кэпсээтэ. Сахалартан бастакы Советскай Союз Геройа Федор Попов туһунан билистибит. Булгуччу сэрииһит эрэ дьоруой буолбат, учуонайдар, моряктар, космонавтар, пилоттар уонна да атын идэлээх, эйэлээх олохтоох дьон эмиэ дьоруой аатын сүгэллэр эбит. Бу «Дьоһуннааҕы кэпсэтиигэ» биһиги киэн туттар дьоммутун биллибит, иһиттибит, кинилэри киэн тутта, холобур оҥосто сылдьыахтаахпыт.
Саяна ГРИГОРЬЕВА, IX кылаас үөрэнээччитэ. Тааһаҕар, Бүлүү.