Биһиги Г.И. Чиряев аатынан 1 №–дээх оскуола эдэр кэрэспэдьиэннэрэ Алина Загитова, Дима Иванов уонна Нина Филиппова Өктөмҥө Билим дьоҕус академиятыгар баран кэллибит. Манна “Кэскил” медиа-ракета сменатыгар өрөспүүбүлүкэ араас улуустарын эдэр кэрэспэдьиэннэрэ кэлэн үөрэннилэр.
Медиасмена муус устар 4-15 күннэригэр буолла. Биһигини «Кэскил» оҕо бэчээтин суруналыыстара Ульяна Анатольевна Павлова, Прокопий Леонидович Софронеев уонна Григорий Григорьевич Местников видеону устарга, интервью ыларга, тиэкис суруйарга дьарыктаатылар.
Саҥа үлэҕэ киирбит куорпуска сынньанар сирэ, актовай саалата, хосторо наһаа тупсаҕай сырдык, ыраас. Атын улуус оҕолорун кытта билистибит, доҕордостубут. Күҥҥэ биэстэ олус минньигэс аһылыгынан аһаттылар. Бу медиасменаҕа устубут, суруйбут үлэбитин «Бэлэм буол» сурунаалга тахсыахтаах. Ону олус кэтэһэбит.
Күнүскү дьарык кэннэ биһиэхэ баһаатайдар араас оонньуулары, тэрээһиннэри ыыппыттара. Бу медиасменаҕа сылдьан элбэххэ үөрэнним, наһаа астынным. Салгыы саҥа доҕотторбунуун суруйсуох буоллубут.
“Кэскил” оҕо хаһыатын уонна Билим дьоҕус академиятын үлэһиттэригэр махтанабын.
Нина Филиппова, «Ориентир» пресс-киин эдэр кэрэспэдьиэнэ,
Г.И. Чиряев аатынан 1№ -дээх Бүлүү орто оскуолата.