Дойду иннигэр бэриниилээх буолуу туһунан оҕолор санааларыттан.
Ытык иэс диэн тугуй?
Хас биирдии киһи дойду иннигэр бэриниилээх дуо? Мин санаабар, ытык иэс диэн төрөппүттэргэр уонна дойдугар иэһиҥ. Оттон дойду иннигэр бэриниилээх буолуу диэн эн дойдуҥ ханнык да балаһыанньаҕа түбэстэр куруук дойдуҥ диэки буолуу дии саныыбын.
Киһи кыра оҕо сааһыттан ийэ-аҕа тапталыгар угуттанан улаатар. Оҕо ис санаата сааһыланан, дойду иннигэр иэстээх курдук сананарыгар, төрөппүт иитиитэ олус улахан суолтаны ылар. Өскөтүн, оҕо куруук бэлэмҥэ үөрэммит буоллаҕына, кэлин оннук киһиттэн киһини иитиэх, дойдуну көмүскүөх киһи тахсарын саарбахтыыбын. Дьиҥ бэйэм, төрөппүттэрим иннигэр улахан иэстээхпин өйдүүбүн. Дойдум ыарахан түгэҥҥэ түбэстэҕинэ, туох баарбынан көмөлөһөргө бэлэммин.
Дойдуну, ийэни-аҕаны таҥнарыы киһи өйүгэр баппат улахан аньыы буоллаҕа. Олоххор саамай күндүгүн, саамай чугаскын таҥнаран баран, салгыы олох олоруохха сөп үһү дуо?! Ыарахан…
Онон киһи ытык иэстээх курдук сананарыгар иитии улахан оруоллаах. Кэмигэр мөҕүллэн, таһыллан улааппыт оҕо олоххо туох күндүтүн өйдүү улаатар. Оттон хас биирдии киһи саамай күндүтүн таптыыр, сыаналыыр уонна көмүскүүр.
Арсен Винокуров, 11 кылаас,
Орто Халыма, Өлөөкө-Күөл б.
Хас биирдии киһиэхэ төрөөбүт дойду диэн өйдөбүл баар
Бу аан дойдуга хас биирдии киһиэхэ төрөөбүт дойду диэн өйдөбүл баар, «биһикпин ыйаабыт сирим» диир сирдэрэ. Тоҕо кини хас киһи аайы күндүнүй… тоҕо диэтэххэ, бу манна барыта аан бастаан буолбута. Аан бастакы хардыыҥ, аан бастакы тылларыҥ, аан бастакы төрөппүттэриҥ биэрбит сылаас тапталлара, аан бастакы доҕотторуҥ, аан бастакы дьиэ кэргэн өйдөбүлэ, иэримэ дьиэҥ сылаас тыына. Ол иһин кини киһи аайы күүстээх ураты суолталаах. Онтукатынан күндү, тугунан да солбуллубат.
Таптыыр дойдубутун, таптыыр төрөппүттэрбитин хаһан да, ханна да умнубаппыт. Куруутун кинилэр иннилэригэр ытык иэстээхпит.
Диана Слепцова, 11 кылаас,
Орто Халыма, Өлөөкө-Күөл б.
Толору дьол
Дойдутун иннигэр, төрөппүттэрин иннигэр ытык иэстэрин төлөөбүт дьон толору дьоллооҕунан аахталлара буолуо. Тоҕо диэтэр, кинилэр таптыыр дьонноругар, дойдуларыгар истиҥ тапталларын, сылаас сыһыаннарын толору арыйбыттар.
Гея Винокурова, 11 кылаас,
Орто Халыма, Өлөөкө-Күөл б.