Булуу улууһун С.Ф.Гоголев аатынан Хампа орто оскуолатын физическай культура учуутала уонна көҥүл тустуу тренера Сивцев Руслан Иванович бу оскуолаҕа былырыыҥҥыттан үлэлии кэлээт, көҥүл тустууга «БООТУР» диэн кулуубу тэрийбитэ. Кини кырачаан тустууктар өрөспүүбүлүкэ тарбахха баттанар тустууктара буолуохтара диэн эрэнэр.
— Мин көҥүл тустууга дьаныардаахтык үлэлиэм, оҕолору таһаартыам диэн санаалаах «БООТУР» тустуу кулуубун арыйбытым. Кыахтаах, эрчимнээх оҕолору таба көрөн, дьарыкпын саҕалаабытым. Ол кэмтэн ыла күүстээхтик дьарыктанан, Россияҕа, Дальнай Востокка, өрөспүүбүлүкэҕэ ыытыллар араас таһымнаах күрэхтэһиилэргэ кэккэ ситиһиилээхпит. Ол курдук, Коновалов Коля (IV кылаас) Благовещенскай куоракка ыытыллыбыт Дальнай Восток «Кубок Мэра» диэн көҥүл тустуу күрэхтэһиитигэр чемпион үрдүк аатын ситиспитэ.
Түөрт иитиллээччибин кытта бу сайын Дагестан Хасавюрт куоратыгар сбордана, эбии дьарыктана, уопут атастаһа бара сылдьыбыппыт. Бу барарбытыгар Хампа нэһилиэгин дьоно-сэргэтэ уонна администрацията (баһылык Тимофеев Афанасий Афанасьевич) спонсордаан ыыппыттара. Сбор кэмигэр Хасавюрт куоракка Бүтүн Россиятааҕы көҥүл тустуу курэхтэһиитигэр кыттан, 4 оҕоттон 3 инники күөҥҥэ тахсыбыттара: Айархаан Николаев II, Афанасьев Дамир, Коновалов Коля III миэстэ буолбуттара, Осипов Костя күрэхтэһии кэмигэр эчэйии ылан, туораабыта. Ол кэнниттэн Чечня өрөспүүбүлүкэтин Грознай куоратыгар Бутун Россиятааҕы көҥүл тустуу күрэхтэһиитигэр Коновалов Коля II миэстэни ылары ситиспитэ, Афанасьев Дамир V миэстэ буолбута.
Сбор кэнниттэн дойдубар «БООТУР» диэн лааҕыры үлэлэппитим. Манна чугас сытар нэһилиэктэртэн кытта кэлэн, 20 оҕо дьарыктаммыта. Атырдьах ыйын бүтүүтэ Горнай улууһун Бэрдьигэстээх нэһилиэгэр буолбут өрөспүүбүлүкэтээҕи көҥүл тустуу күрэхтэһиитигэр Коновалов Коля I, Афанасьев Дамир III, Осипов Костя III миэстэ буолан, илии тутуурдаах, өттүк харалаах кэлбиппит.
Үөрэх дьыла саҕаланыыта Москва куоракка ыытыллыбыт Бүтүн Россиятааҕы «Поддубная лига» диэн күрэхтэһиигэ Коновалов Коля III бириистээх миэстэни ылбыта.
Алтынньы 15 күнүгэр Хампа орто оскуолатын иһинээҕи 35 үөрэнээччи кыттыылаах хапсагай күрэҕин тэрийэн ыыппытым. Муҥутуур кыайыылааҕынан кыра ыйааһыҥҥа Коновалов Коля, улахан ыйааһыҥҥа Катанов Руслан буолбуттара.
Бу маннык курдук, биир сыл иһигэр үрдүк ситиһиилэннибит. Өссө даҕаны оҕолорбун күүскэ дьарыктаан, өрөспүүбүлүкэҕэ тарбахха баттанар тустууктар буолуохтара диэн эрэнэбин. Түгэнинэн туһанан, куруутун өйүүр төрөппүттэрбитигэр, спонсордарбытыгар, Хампа орто оскуолатын кэллэктиибигэр, Хампа нэһилиэгин баһылыга Тимофеев Афанасий Афанасьевичка тус бэйэм ааппыттан махталбын тиэрдэбин. Иннибитигэр элбэх дьарык, күрэхтэһии, араас таһымнаах сбор күүтэр.