Саҥа үөрэх дьылын аанын үөрэ-көтө астыбыт. Маҥнайгы кылааска 9 оҕо үөрэнэ киирдэ. Биһиги оскуолабыт попечителлэрэ Иннокентий Валерьевич, Сардана Валерьевна, Игорь Валерьевич Марковтар быйыл 4-с сылын 10 кылааска киирэр бастыҥ үөрэнээччигэ анал стипендияларын анаатылар.
Стипендияны үөрэх туйгуна Гаврил Прокопьев билии күнүгэр дохсун ытыс тыаһыгар тутта.
Саха Өрөспүүбүлүкэтин үөрэҕириитин систиэмэтигэр И.П. Любимова Ааҕыы сылын биллэрбитэ. Онно сөп түбэһиннэрэн Марковтар алын сүһүөх оҕолоругар анаан «Детское чтение» серияттан дьоһун бэлэх оҥордулар. Оҕолор тута сөбүлүү көрбүт кинигэлэрин уларсан бардылар.
Онтон мин А. Толстой «Золотой ключик или приключения Буратино» диэн наһаа үчүгэй кинигэни уларсыбытым. Кинигэ ойуулааҕа ордук киэргэтэр. Кыра сылдьан мультигын эрэ көрбүтүм. Билигин бэйэм ааҕан, өссө бырааппар кэпсиир кыахтаахпын. Биһиэхэ маннык бэлэх оҥорбут дьоммутугар махталбыт улахан.
Варя Евсеева, 6 кылаас, Күүкэй нэһ.
Сунтаар улууһа.