От ыйын 15 күнүттэн Н.И. Прокопьев аатынан Хатыы орто оскуолатын «Лэкээ» үлэ-от лааҕыра үлэтин саҕалаата. Лааҕырга 20 оҕо сылдьар. Быйылгы сезоҥҥа агро хайысхалаах оскуола үөрэнээччилэрэ 70 тонна оту оттуохтаахтар.
Кулуһуннаах диэн оттуур сирбитигэр оппут үүнүүтэ быйыл үчүгэй. Оскуолабытыгар бу саас Сунтаар Кутанатыттан баран ылбыт STAR-3000 BIG диэн аныгы пресс-подборщикпыт үлэлиир.
Оппут былаана бу сырыыга улаатта: кэлиҥҥи кэмҥэ оскуола 20-30 тоннаны оттуур буоллаҕына, быйылгы былааҥҥа 70 т оту кыайыахтаахпыт.
Оҕолор от лааҕырыгар үлэлииллэрэ — бу Саха сиригэр сайыҥҥы кэмҥэ ыччаты үлэҕэ иитии уонна доруобуйаларын чэбдигирдии биир саамай туһалаах уонна үгэс буолбут ньымата буолар. Бу үлэ оҕо сайдыытыгар, айылҕалыын сибээһигэр уонна кэлэр кэскилигэр улахан суолталаах. Лааҕырбыт өссө биир туһата — оҕолор бэйэлэрин күүстэринэн тугу эмэ оҥорорго, тулуурдаах буоларга уонна үлэ от суолтатын өйдүүргэ үөрэнэллэр. Сайыҥҥы ыраас салгыҥҥа, айылҕаҕа сылдьыы уонна хамсаныы эт-сиин өттүнэн күүһүрэр усулуобуйаны оҥорор.
Маны таһынан күннэтэ көрөр-истэр агро-оскуолабыт хороҕор муостаахтара уонна сыспай сиэллээхтэрэ элбээн иһэллэрэ биһигини үөрдэр. Биир сыаллаах-соруктаах үлэ оҕолору бэйэ-бэйэлэригэр көмөлөһөр буоларга, хамаанданан үлэлииргэ үөрэтэр уонна оҕолор бэйэлэрин бастакы хамнастарын ылан, харчы сыаната тугун өйдүүллэр.
Хатыы агро хайысхалаах орто оскуолатын медиа-киинэ, Ньурба.
Кэскил14.ру