Бэс ыйын 7-9 күннэригэр Дьокуускай куоракка Эргэ Табаҕаҕа «Табаҕа тумса» сынньанар сиригэр өрөспүүбүлүкэтээҕи эдэр туристар күрэхтэһиилэрэ буолан ааста. Тааттаттан биһиги 8 кылаас үөрэнээччилэрэ Алёна Таппырова, Айаана Семёнова, Диана Хастаева, Эрсан Олейников, Максим Рахлеев уонна Сахаян Соломонов баран кыттыыны ылбыппыт.
Күрэхтэһиигэ уопсайа 7 хамаанда кыттыбыта: Уус-Алдантан, Тааттаттан, Мэҥэ-Хаҥаластан, Чурапчыттан, икки хамаанда Дьокуускайтан уонна Амматтан. Бастакы күҥҥэ олорор сирбитин киэргэппиппит. Иккис күммүт сарсыардааҥҥы эти уһугуннарыыттан саҕаламмыта, онтон бары хаамыынан походка барбыппыт. Ол хаама сылдьан Өлүөнэ өрүскэ, тутулла сылдьар муоста көстүүлээх көрдөрүү былаһааккатын, ситэ тутуллубатах хлор станциятын уонна эмиэ саҥа тутулла сылдьар оҕо киинэ «Хотугу сулус» диэн сирдэри көрбүппүт. Онтон салгыы «Бэлэм буол» сурунаал бэлэмнээбит квиз оонньуутун уонна спортивнай ориентированиены ааспыппыт.
Бүтэһик үһүс күммүтүгэр турполоса түһүмэҕэр бэйэбитин тургутан көрбүппүт. Ити курдук умнуллубат үс күммүт түргэн-түргэнник ааһа оҕуста. Турслет кэмигэр элбэх оҕону кытта билсиспиппит, элбэх саҥаны билбиппит. Биһиги бу күрэхтэһиигэ бастакыбытын кыттан көрдүбүт. Наһаа ураты, интэриэһинэй эбит, олус сөбүлээтибит.
Күрэх түмүгүнэн биһиги хамаандабыт үһүс миэстэни ылан, үөрүүбүт өссө бүк үрдээтэ.
Алена Таппырова, В.И. Ленин аатынан Уолба орто оскуолатын VIII кылааһын үөрэнээччитэ, Таатта.
Кэскил14.ру