Мин эһиэхэ икки дьоруойбун — хос эһэм Николаев Фома Кононович уонна кини сиэнэ Тобонов Станислав Степанович тустарынан кэпсиэм. Иккиэн миэхэ чугас дьоннорум, иккиэн бэйэлэрин олохторун дойдуларыгар анаабыт саха хорсун буойуттара.
Хос эһэм Фома Кононович 1906 сыллаахха Николаевтар (Олойдор) дьиэ кэргэннэригэр төрөөбүтэ. Акана-Хорула нэһилиэктэригэр биллэр тойуксут, оһуохай тылын этээччи этэ. 1941 сыллаахха Аҕа дойду сэриитигэр бэбиэскэ тутан, Иркутскай байыаннай-пересыльнай пуунугар барар. Сэрии уохтаах хонуутугар бойобуой суолун туһунан элбэхтик билбэппит эрээри, эбээм кэпсииринэн, кини үчүгэй повар быһыытынан биллэр эбит: саллааттары элбэхтик уонна үчүгэйдик аһатар, сэрии кэмигэр да киһи быһыытын сүтэрбэккэ, хаһан да ыарахан тылы этэн киһини хаарыйбатах. Рядовой-стрелок буолан сэрии толоонугар дьулуурдаахтык уонна эппиэтинэстээхтик сулууспалаабыт.
Хос эһэм сиэнэ Тобонов Станислав Степанович 1982 сыллаахха Хорула нэһилиэгэр Тобоновтар дьиэ кэргэннэригэр төрөөбүтэ. Ийэтэ Тобонова Марфа Фомична, аҕата Тобонов Степан Ильич. Оҕо сааһыттан бултка сыстаҕас этэ. Балтыта Лилия кэпсииринэн, кыра эрдэҕиттэн моонньугар куруук рогатка иилинэр эбит, Эбэ кытыытыгар бараахтары, тыыраахылары ытыалаан бөҕө буолар эбит. Балтытын Лилияны кутурук гынан наар илдьэ сылдьар, капкаан бөҕө иитэллэрэ уонна туойунан буулдьа оҥорор эбиттэр. Улаатан баран туулаан, капкааннаан андаатар, киис, тииҥ тириилэрин туттарар буолбут. Убайдара бары булчут буоланнар «Оо, бырааппыт Байанайдаах киһи» диэн этэллэрэ. 2000 сыллаахха армияҕа сулууспалыы барбыт, 2002 сыллаахха сержант званиетын ылан, дойдутугар төннүбүт. Онтон контракт баттаан анал байыаннай дьайыыга ыам ыйыгар дойдутун чиэһин көмүскүү барбыта. Позывнойа «Берёза», званията — сержант. Фроҥҥа балаҕан ыйын саҕаланыытыгар киирбит, хомойуох иһин 2025 сыл балаҕан ыйын 19 күнүгэр бииргэ сылдьыбыт этэрээтин кытта кыргыһыы толоонугар дьоруойдуу охтубут.
Мин дьоруойдарым — мин чугас дьонум. Мин дьонум хорсун санааларынан, Ийэ дойдуга тапталларын киэн туттабын.
Настя Семёнова, Ньурбатааҕы техническэй лиссиэй «Объектив» медиа-киин эдкора.
Кэскил14.ру