Омуктары кытта доҕордуу буолуоҕуҥАлексей Елисеевич Кулаковскай-Өксөкүлээх Өлөксөй „Оттоку олук алгыһа» айымньытын ааҕан баран, ааптар биһиэхэ, саха ыччатыгар, саха норуотугар алгыс көмөтүнэн үтүөнү баҕарбыт, суолбутун арыйан биэрбит, сырдыкка, кэрэҕэ түстээбит диэн санаатым.
Олоххо нууччаны да, саханы да кытта доҕордос, үтүө атас буол диир. Хайа да норуот дьонун кытта иллээх-эйэлээх буоларбыт, биир тэҥҥэ турарбыт — бу биһиги норуоппут ураты кыаҕын, күүһүн көрдөрөр.
Саха киһитэ — үлэһит. Кини айылҕалыын биир тэҥ. Тымныы кыһыҥҥа, куйаас сайыҥҥа сылайбакка үлэлиир тулуурдаах омук. Өксөкүлээх Өлөксөй саха омугун сылгыны, сүөһүнү иитиҥ, дэлэтиҥ диир. Ол аата бэйэбит астанан-үөллэнэн олорор кыахтаах омук буолуохтаахпыт.
Маны тэҥэ саха киһитэ бэйэтин норуотунан, омугунан киэн туттан, тылын, культуратын сүтэрбэккэ, бэйэтин норуотугар улахан көмө буолуохтаах эбит, сытыы кылыс тыллаах буолуҥ диэн баҕарар.Бу сайын олоҥхо өрөспүүбүлүкэтээҕи ыһыаҕар кыттан кэлбитим. Олоҥхоҕо, оһуохайга үөрэнэ сылдьабын, саха өбүгэ оонньууларынан дьарыктанабын, сахалыы саҥарабын, суруйабын, сахалыы толкуйдуубун — бу мин баайым буолар дии саныыбын.
Саха омуга сайдар кыахтаах диэн эрэнэбин, онно хас биирдиибит тус кылааппытын киллэриэхпитин сөп.
Богдан Слепцов, М.Е.Васильева аатынан 2 Малдьаҕар орто оскуолатын 8 кылааһын үөрэнээччитэ, «УОТ» медиакиин