Алтынньы 9 күнүгэр аан дойду үрдүнэн почта күнүн чэрчитинэн нэһилиэкпитигэр «Сурутааччы күнэ» буолан ааста. Бу тэрээһин «Айхал» сынньалаҥ киинигэр буолла. «Сурутааччы күнүн» олохтоох почта үлэһитэ Светлана Николаевна Смолина уонна оскуолабыт бибилэтиэкэрэ Елена Тимофеевна Васильева көҕүлээн ыыталлар. Бүтэйдээхпитигэр үгэс буолбут тэрээһин ыытыллыбыта уонтан тахса сыл буолла.
Тэрээһини оскуола бибилэтиэкэрэ Елена Тимофеевна иилээн-саҕалаан ыытта. «Чэчир» биэбэйик иитиллээччилэрэ хоһоон аахтылар. Оскуолабыт оҕолоро кылаастарынан сүрдээх үчүгэйдик хаһыат, сурунаал рекламаларын көрдөрдүлэр. Ол курдук, V кылаастар «Чуораанчык» сурунаалы, VI кылаастар «Кэскил» хаһыаты, VII кылаастар «Кэскил» хаһыаты, «Бэлэм буол» сурунаалы рекламалаатылар. VIII кылаастар дьиэ кэргэн ааҕар хаһыаттарын, сурунаалларын туһунан сэргэх сценканы көрдөрдүлэр. IX кылаастар төрөппүттэрбит сөбүлээн ааҕар «Далбар хотун», «Байдам», «Чолбон» сурунаалларын, X кылаастар «Кыым» хаһыаты, XI кылаастар улууспут хаһыатын «Эркээйини» сырдаттылар.
Биһиги, алын кылаас үөрэнээччилэрэ, бары кыттыһан «Чуораанчык» диэн хаһыаты оҥорбуппут уонна почта үлэһитигэр Светлана Николаевнаҕа туттарбыппыт. Нэһилиэк бибилэтиэкэрэ Александра Николаевна Соловьева хаһыаттар, сурунааллар тустарынан биктэриинэ ыыппыта. Тэрээһин түмүгүнэн, нэһилиэкпит тэрилтэлэрин салайааччылара, кылаас салайааччылара, биирдиилээн дьон 2026 сыл бастакы аҥаарыгар сурутууга көхтөөхтүк кытыннылар. Түмүккэ, Светлана Николаевна Смолина «Сурутааччы күнүн» ыытыыга көмөлөспүт дьоҥҥо сэмэй бэлэхтэрин туттартаата.
Аделина Прокопьева, К.О. Гаврилов аатынан сорох предметтэри дириҥэтэн үөрэтэр Бүтэйдээх орто оскуолатын IV кылааһын үөрэнээччитэ,
Мэҥэ Хаҥалас улууһа.
keskil14.ru