Бүгүн, алтынньы 14 күнүгэр, Саха сирин былааҕын күнэ бэлиэтэнэр. 1992 сыл алтынньы 14 күнүгэр, Саха Өрөспүүбүлүкэтин Судаарыстыбаннай былааҕа Үрдүкү Сэбиэт XV сессиятыгар бигэргэтиллибитэ.
Былаахха күөх халлаан күөнүгэр күөрэйбит үрүҥ күннээхпит. Ол анныгар маҥан, кыһыл, от күөҕэ сурааһыннар ойууламмыттар. Күөх халлааны уонна күнү кытта маҥан сурааһын дьүөрэлэспитэ хоту дойду тыйыс айылҕатын кэрэ көстүүтүн, кинилэр майгылара сиэрдээх олохторо ырааһын көрдөрөр. От күөх өҥ — Саха сирин күөх сайына, үүнүү-сайдыы, барҕарыы, доҕордоһуу бэлиэтэ буолар. Кыһыл өҥ — ийэ дойдуга бэриниилээх буолуу, олоххо тардыһыы күүһүн кэрэһитэ.
Саха былааҕын бырайыагын ааптардарынан Айина Петровна Захарова, живописец, художник-педагог, Слепцова Людмила Даниловна, живописец, СР искусствотын үтүөлээх деятелэ, РФ худуоһунньуктарын сойууһун чилиэнэ, Старостин Михаил Гаврильевич, график, дизайнер, РФ худуоһунньуктарын сойууһун чилиэнэ буолаллар.
Былаах — норуот. Былаах — өй дууһата. Былаах — саха инникитэ. Уруй-айхал Сахабыт сирин дьонугар!
keskil14.ru