Бүгүн биһиги Хаҥалас улууһун «Кыымчаан» уһуйаанын иитээччитин Иванова Валентина Семеновнаны кытта көрсөн кэпсэттибит. Кини иитээччи идэтин туһунан санаатын үллэһиннэ.
— Валентина Семеновна, эн уһуйааҥҥа бастакы үлэҥ күнүн туһунан кэпсиэҥ дуо?
— Мин 19 сааспыттан уһуйааҥҥа үлэлии кэлбитим. Маҥнай «Ручеёк» диэн нуучча дьыссаатыгар этэ. Бастакы үлэм күнүгэр Бэстээххэ наһаа кыра оҕолорго киирбитим, ол киирэн баран, наһаа соһуйбутум, кыра оҕолору көрөн баран, тугу гыныахпын билбэтэҕим. Хата ньээҥкэм баар буолан, кини көмөлөспүтэ, ол кэнниттэн оҕолор кыралаан сыстан киирэн барбыттара.
Төрөппүттэр миигин бастаан утаа оҕо курдук көрбүттэрэ уонна: «А где воспитательница?» — диэн ыйыппыттара, онуоха мин: «Я воспитательница», — диэбиппэр хайдах эрэ итэҕэйбэтэхтии көрбүттэрэ. Бэйэм соччо саҥата-иҥэтэ суох этим, биирдэ аһаҕас занятие ыыппытым, онно сэбиэдиссэй, иитээччилэр киирэн көрбүттэрэ уонна сөбүлээбиттэрэ: «А голос-то есть, оказывается», — диэбиттэрэ.
— Детсадка оҕолоргутун кытта саамай долгутутуулах түгэҥҥит ханнык этэй?
— Оҕолор оскуолаҕа бардахтарына, уһуйааннарын ордук ахталлар. Көрсө биэрдэхпитинэ хайаан да кэпсэтэллэр. Сорох оҕолор: «Оо, Валентина Семеновна иһэр, саамай сөбүлүүр воспитательбит», — диэтэхтэринэ, киһи олус долгуйар.
— Валентина Семеновна, арай урут бэйэҥ саҥа үлэлии кэлбиккин. Киниэхэ эн тугу сүбэлиэҥ этэй?
— Бэйэм эдэр, үлэни саҥа саҕалаан эрэрбэр аһаҕас, кэпсэтинньэҥ буол диэн сүбэлиэм этэ.
— Иитиллээччилэргит оҥоһуктарыттан ханныктар баалларый?
— Биһиги выпускниктарбыт тиһэх чуорааҥҥа иитээччилэрин хайаан да ыҥырааччылар. Онно Улахан Аан айылҕатын уруһуйдаабыттарын бэлэх туппутум. Ол уруһуйдары көрөн, оҕолорбут талааннаах да буолбуттар эбит диэн, киһи сөҕөр. Ол хартыыналарым дьиэбэр саамай көстөр сиргэ ыйанан тураллар.
Оҕолору кытта үлэ олус эппиэтинэстээх. Төрөппүттэр саамай күндү киһилэрин биһиэхэ уһуйааҥҥа аҕалаллар. Саамай оҕо сөбүлүүрэ — оонньуу буолар. Онон оҕолору кытта оонньуурбун, оҕолору оонньоторбун, онтон оҕолор үөрэллэриттэн астынабын.
Слепцов Богдан, 8 кылаас үөрэнээччитэ
Надежда Громова, эбии үөрэхээһин педагога
«УОТ» медиакиин