Ааспыт нэдиэлэ устата оскуолабытыгар бииртэн биир сонун үгүс тэрээһин буолан ааста. Ол курдук ВСОШ олимпиадалара саҕаланнылар. Бастакы олимпиада «Астрономия» предметигэр буолла. Алтынньы ый бүтүөр диэри араас предметтэргэ олимпиадалар салгыы ыытыллыахтара. Онон үөрэнээччилэргэ ситиһиилэри баҕарабыт.
Алтынньы 1 күнүгэр Аан дойдутааҕы Музыка күнэ бэлиэтэммитэ. Манан сибээстээн оскуолабытыгар перемена кэмигэр караокелаабыппыт. Бука бары сөбүлүүр сахалыы ырыаларбытын дуоһуйа ыллаабыппыт, сэҥээрэн истибиппит.
Маны таһынан алтынньы 1 күнүгэр Аҕам саастаахтар күннэригэр ытык кырдьаҕастарбытыгар тимуровскай көмө оҥордубут, ыллаан-туойан, сэмэй бэлэх туттаран, баҕа санаа тылларын этэн бырааһынньыгынан эҕэрдэлээтибит.
Кырдьаҕас дьон оҕолорго махтанан үөрдүлэр-көттүлэр. Кинилэргэ кытаанах доруобуйаны, чэгиэн-чэбдик буолууну баҕарабыт.
Валерия ГОТОВЦЕВА, XI кылаас,
М.Н. Готовцев аатынан Танда орто оскуолата, Уус Алдан