Бу күннэргэ Марха орто оскуолатын 5-11 кылааһын үөрэнээччилэрэ Марха өрүс күнүн чэрчитинэн ыытыллыбыт «Ыраас биэрэк» акцияҕа кыттыыны ыллыбыт.
Марха өрүскэ сылын аайы дьыл хайа баҕарар кэмигэр олус элбэх киһи сынньанан, балыктаан ааһар, сайынын итии, куйаас күннэргэ сөтүөлээн сөрүүкүүр. Инньэ гынан элбэх бөх-сыыс ыһыллар. Пластик бытыылкалар, аһылыгы угар салапаан, ол-бу кэнсиэрбэ бааҥката, балыктыыр тэрил алдьаммыта сиргэ бөх буолан сыталлар. Үөрэнээччилэр бары, ону таһынан оскуола үлэһиттэрэ күргүөмүнэн биэрэк кытыытынааҕы бөҕү-саҕы ыраастаатыбыт. Халлааммыт да туран биэрэн астына-дуоһуйа аһаҕас халлаан анныгар астына аһаатыбыт, быыһыгар спининнээн күрэхтэстибит.
Аһатан-сиэтэн олорор өрүспүт кытылын бары ыраастык тутуоххайыҥ, хас биирдии киһи бэйэҕит кэннигититтэн бөххүтүн хомуна сылдьыҥ.
Александр Федоров, 11 кылаас үөрэнээччитэ, «Уткин сонуннара» медиакиин юнкора,
К.Д. Уткин аатынан Марха орто оскуолата.
Хатыҥ-Сыhыы сэл., Ньурба.
keskil14.ru