Күрэс төрүт көрүҥнэригэр XXII «Манчаары оонньуута» үөрүүлээх арыллыытыгар Таатта эр дьоно, барыта 150 эр киһи, «Манчаары оонньуутун» өрөгөйүн ырыатын толорон көрөөччүлэр сүргэлэрин көтөхпүттэрэ. Онтон «Манчаары оонньуутун» өрөгөйүн ырыатын матыыбын Ийэ олоҥхоһут Петр Решетников-Көһөҥө Бүөтүр хос сиэнэ Ариана Решетникова суруйбутун билэр этигит дуо?
Ариана Решетникова 19 саастаах, «Айар Уустар» креативнай индустрия» кэллиэһин устудьуона. Былатыан Ойуунускай аатынан Чөркөөх орто оскуолатын бүтэрбитэ. ЮНЕСКО стипендиата, алгысчыт, Ийэ олоҥхоһут Петр Егорович Решетников-Көһөҥө Бүөтүр төрөппүт оҕолоруттан билигин соҕотох хаалбыт кыыһа, хоһоонньут, олоҥхоһут Розалия Петровна Докторова сиэнэ.
Ариана хос эһэтин, эбэтин утумнаан эмиэ кыра эрдэҕиттэн хоһоон суруйар. Онтон онус кылаастан саҕалаан ырыа айарга холонор.
Бу дьыл олунньутугар СӨ култуураҕа уонна духуобунас сайдыытын министиэристибэтэ «Манчаары оонньууларын» өрөгөйүн ырыатын суруйарга куонкурус биллэрбитэ. Онно киирбит үлэлэртэн Ариана Решетникова матыыба кыайыылаах тахсыбыта уонна бириэмийэнэн наҕараадаламмыта. Онтон өрөгөй ырыатын тиэкиһин ааптара Ариана аймах уола Дьулустаан Толстяков.
— Матыып бэрт түргэнник суруллубута, 30-ча мүнүүтэ иһигэр айыллыбыта. Бу саас Тааттаҕа өрөгөй ырыатын толоруутугар эр дьоҥҥо куонкурус биллэриллэн, хас биирдии нэһилиэктэн уон уол, уон эр дьон кыттыыны ылбыттара. Онтон XXII «Манчаары оонньууларын» арыллыытыгар ырыа күрэҕин кыттыылаахтара бары, 150 эр дьон, толорбуттара. Наһаа долгутуулаах этэ, биһиги аймах бары олус үөрбүппүт. Дьиҥэ, мелодия күрэҕэр кыайыам эрэ дии санаабатаҕым. Онтон билигин саныыбыт ээ, аны «Манчаары оонньуутун» 50 сыллаах үбүлүөйүгэр 47 саастаах буолабын диэн, — Ариана Решетникова кэпсиир.
Ийэ олоҥхоһут Петр Решетников-Көһөҥө Бүөтүр кэлин сааһыран баран олоҥхолуур буолбута. Дьоҥҥо-сэргэҕэ олоҥхолуурун Д.К. Сивцев-Суорун Омоллоон сүбэтинэн саҕалаабыта. Петр Егорович биир уратыта диэн кини олоҥхо айымньыларын суруммакка, тута хоһуйан олоҥхолуура.
Петр Решетников-Көһөҥө Бүөтүр оҕолорго анаан үс олоҥхолоох. Олортон биирдэстэрин хос сиэнэ Ариана Решетникова оҕо сылдьан толорон араас күрэхтэргэ кыттара. Билигин эһэлэрин аатынан Олоҥхону толоруу күрэҕэр дьиэ кэргэнинэн өрүүтүн кыттыыны ылаллар.
Петр Решетников-Көһөҥө Бүөтүр олоҥхолоро:
«Сүүрэр сулус сырыыта сырыылаах Сыыйылла Хара аттаах аһыныгас санаалаах Айыы Дьураҕастай» (түөрт чаастаах).
«Тоҕус күс сири атаҕын анныгар аралдьыта үктүүр ала дьоруо аттаах Уордаах кылыннаах Уордайа хаан бухатыыр» (биэс аҥар чаастаах).
«Ала Чуоҕур аттаах Араан Мохсоҕоллой бухатыыр».
«Манчаары оонньуутун Өрөгөйүн ырыата»
Дьулустаан Толстяков тыла
Ариана Решетникова матыыба
Михаил Варламов аранжировката
Сайыммытын уруйдаан
Тоҕуоруһа мустаммыт,
Бастыҥ дьону быһаарар
Түһүлгэҕэ киирдибит.
Үйэлээх үгэс буолбут
Норуот таптыыр күрэҕэ
Манчаары оонньуулара
Саха омук сүрэҕэр.
Номох буолбут убайбыт
Сүдү-сүҥкэн кылаата
Манчаары оонньуулара
Саха спордун чыпчаала
Кэрэ куону сырсаннар
Сүүрүүктэр түһүннүлэр,
Мас тардыһыы, хапсаҕай,
Соноҕостор көттүлэр.
Саха дьонун бастыҥа
Манчаарыны уруйдаан,
Маннык үрдүк таһымҥа
Кыайыылааҕы айхаллаан!
keskil14.ru