От ыйын 2 күнүгэр, спортивнай суруналыыс аан дойдутааҕы күнүн көрсө, өрөспүүбүлүкэтээҕи медиа кииҥҥэ Таатта улууһугар ыытыллар күрэс төрүт көрүҥнэригэр XXII «Манчаары оонньуулара» наҕараадатын атрибутикатын уонна бигэргэммит таҥаһын биһирэмэ буолан ааста.
Тэрээһиҥҥэ СӨ Бырабыытылыстыбатын Бэрэссэдээтэлин солбуйааччыта Сергей Местников, СӨ физическэй култуура уонна успуорт миниистирэ Леонид Спиридонов, Баһылай Манчаары аатынан өрөспүүбүлүкэтээҕи спорт төрүт көрүҥнэрин киинин дириэктэрэ Геннадий Васильев, тэрийээччилэр, суруналыыстар кыттыыны ыллылар.
Бастатан туран, Сергей Местников, мустубут суруналыыстары бэлиэ күнүнэн эҕэрдэлээтэ уонна «Манчаары оонньуулара» көннөрү күрэс эрэ буолбакка, саха норуотун национальнай уратыта, култууратын сыаннаһа уонна баайа диэн бэлиэтээн эттэ:
— Күрэс төрүт көрүҥнэригэр XXII «Манчаары оонньуулара» тэрийиитигэр биир сүрүнэ күрэс Концепциятыгар болҕомтону уурбуппут. Быйылгы «Манчаары оонньууларын» Концепциятын тутула, урукку кэмнэри кытары тэҥниир эбит буоллахха, төрүт култуурабытын, төрөөбүт тылбытын харыстыырга, эйгэтин тарҕатыыга уонна сайыннарыыга туһуланар. Бу икки эрэ күннээҕитэ Тааттаҕа Ытык Күөлгэ бэлэмнэнии хаамыытын көрө тахса сырыттыбыт, ол түмүгүнэн Таатта улууһа спортсменнары, кыттааччылары, ыалдьыттары көрсөргө бэлэм олорор.
Бастакынан XXII-с «Манчаары оонньууларын» тэрийээччилэрин, судьуйаларын, сүрүн судьуйаларын, СМИ бэрэстэбиитэллэрин таҥастарын-саптарын аҕыс спортсмен тахсан билиһиннэрдэ. Таҥас комплега биир стилистическай дизайннаах, саха төрүт оһуордарыгар, «Манчаары оонньууларын» ымыыларыгар олоҕуран оҥоһуллубут.
Күрэс төрүт көрүҥнэригэр XXII «Манчаары оонньуулара» мэтээллэрин сахалыы таҥастаах оҕолор биир-биир тахсан көрдөрдүлэр.
«Манчаары оонньууларын» чөмпүйүөннэрин мэтээлэ — 280 г ыйааһыннаах, 8 см кэтиттээх. Сүрүн сирэйгэ маҥан аттаах Манчаары уобараһа «Күрэс төрүт көрүҥнэригэр XXII Манчаары оонньуулара» диэн суруктаах.
Кыра кээмэйдээх бириистээх мэтээллэр (7 см, 160 г) сүрүн наҕараада дизайнын хатылыыллар. Тренердэргэ аналлаах мэтээллэр «биэс харах» харысхал ымыылаах.
Муҥутуур кыайыылаах мэтээлэ — бу күрэс үрдүкү наҕараадата. Төрүт күрэс 11 көрүҥүн элеменнэринэн киэргэтиллибит, ыйааһына — 315 г.
Аны быйылгы «Манчаары оонньууларын» уратыта — чөмпүйүөннэр кубоктара. Кубок саха норуота былыр-былыргыттан улахан күрэхтэһии түһүлгэлэригэр мүһэ эти күүс-уох, дэлэй бэлиэ быһыытынан өрө тутууларын бэлиэтиир. «Мүһэ» кубок 8 киилэ ыйааһыннаах, хорҕолдьун уонна сибиниэс холбоһугуттан оҥоһуллубут.
Күрэс төрүт көрүҥнэригэр XXII «Манчаары оонньуулара» наҕараада атрибутикатын дизайнын ааптарынан Баһылай Манчаары аатынан өрөспүүбүлүкэтээҕи спорт төрүт көрүҥнэрин киинин үлэһитэ Вячеслав Мартынов буолар.
Сиһилии «Кэскил» оҕо-пресс киинин юнкора Стас Попов кэпсиир:
keskil14.ru