Улуу Кыайыы 80 сылыгар, Арассыыйаҕа Аҕа Дойдуну көмүскээччи уонна Саха сиригэр Ийэ дойдуну көмүскээччи сылыгар аналлаах Үрүҥ Тунах Ыһыах Абаҕабыт нэһилиэгэр бэс ыйын ыйын 14 күнүгэр ыытылынна.
Быйыл нэһилиэкпит тэриллибитэ 100 сылыгар анаан Хоролортон төрүттээх Халаалы Хотун боотурдарыттан биирдэстэригэр, Абаҕаны төрүттээбит Абаҕа Баатырга анаммыт скульптурнай композиция олохтоохтор үөрүүлэригэр, ыалдьыттар сэргииллэригэр ыһыах күн арылынна.
… «Бэргэһэтин устан, бар дьонун ытыктаан, дойду ахтылҕанын дьиҥ билбит киһи туттан-хаптан турарыгар да баар. Үксүгэр көрөбүт ээ, сэрии куйаҕын толору кэппит, ахсым ат үрдүгэр үҥүүтүн-батаһын күөрэччи көтөхпүт баатырдары. Онтон биһиги Абаҕабыт Баатыра ытык иэһин төлөөн, эйэлээх олох кэлиэҕэр эрэли үөскэтэр сүүнэ тыыннаах диэн ылынным».
Бу көрөөччү этиитигэр мин сөпсөһөр эбиппин. Сэрии сотору бүтэн дьоммут дойдуларыгар чэгиэн эргиллэн кэлэллэрэ буоллар.
Ыһыах сиэрин-туомун кэнниттэн 1944 сыллаахха ыытыллыбыт Кыайыыны түстүүр Амма Ыһыаҕын дьүһүйүүтүн сэргии көрдүбүт. Нэһилиэкпит Үстүүн Нохсоороп аатынан Духуобунас киинигэр «Кэнчээри 2025» диэн түөлбэ оҕолоругар аналлаах сэргэх күрэх ыытылынна.
Ыһыахпытыгар Макар Ильич Тимофеев аатын үйэтитэр хапсаҕай аһаҕас күрэҕэ уонна үрдүкү кылаас оҕолоругар баатыр оонньуулара көрөөччүлэри түмтэ. Хапсаҕай да, боотур да оонньууларын кэмнэригэр кыттааччылар ардах түһэрин аахсыбакка, тохтообокко күрэхтэстилэр. Күрэхтэһээччилэр тулуурдарын, кыайыыга дьулуурдарын көрдөрдүлэр. Баатыр оонньуулар кыайыылаахтарынан 1 миэстэ – Алеша Николаев, 2 миэстэ – Антон Никитин, 3 миэстэ – Радмир Романов буоллулар.
Нэһилиэкпит Ыһыаҕын сыллата сыраларын биэрэн туран тэрийэр дьоммутугар барҕа махталбытын этэбит. Быйылгы Ыһыах эмиэ уратытык буолан ааста. Дьон дуоһуйан, сынньанан, махтанан тарҕаста.
Гаврил Прокопьев, А.Е. Кралин аатынан оскуола 9 кылааһын үөрэнээччитэ.
keskil14.ru