Бүгүн, балаҕан ыйын 11 күнүгэр, миэхэ эрэ буолбакка, атын да эдэр кэрэспэдьиэннэргэ олус да долгутуулаах уонна эппиэтинэстээх күн буолла, ол эбэтэр Сахабыт сирин инновациятын миниистирин Василий Васильевич Ефимовтыын көрсүһүү, кэпсэтии буолан ааста.
Ол эрээри хороҕор муостаах, кыыл табалаах, тула өттө таас хайалардаах, хоту дойдубар Эбээн-Бытантай национальнай улууһугар олорор буолан, интернет сибээспит куһаҕан диэбэккэбин, ыарахаттартан чаҕыйбаккабын, видео сибээһинэн холбонон, бэйэбин эрэ буолбакка, бүтүн улууспун долгутар ыйытыыбын ыйыттым. Биллэн турар биһигини долгутар ыйытыы: саҥа оскуола тутуллуута буолар. Ол эрэн үчүгэй хоруй ылан үөрүүм муҥура суох, оскуолабыт эбэһээт тутуллуо диэн бука эрэллээхпит, төһө да оскуолабын бүтэрэрим икки эрэ сыл хаалбытын үрдүнэн мин кэннибиттэн үөрэнэр оҕолор сырдык, саҥа, киэҥ оскуолаҕа үөрэниэ этилэр диэн баҕа санаам хайаан да туолуо!
Манан үчүгэй сонун бүппэт, Василий Васильевич биһиги «БИРАКЧААН» медиакииммитигэр экшн-камера бэлэхтиэм диэн соһуччу үөрдэн турда. Үөрүүбүтүттэн халлааҥҥа көтүөхпүтүн кынаппыт суох. Маннык өйөбүл кэнниттэн үлэбит өссө таһаарыылаах, тыҥааһыннаах буолуо диэн эрэннэрэбит.
Түгэнинэн туһанан, Василий Васильевичка муҥура суох махталбытын тириэрдиэ этибит, бэлэхпитин туттубут эрэ, тутатына видео уһулан ыытыахпыт диэн тылбытын биэрэбит.
Маннык көрсүһүүлэр тулалыыр эйгэбитин, медиа эйгэҕэ үлэбитин олуһун диэн кэҥэтэр, инникитин үлэлиирбитигэр бигэ санаа буолар!
Наум Наумов,
И.Н. Слепцов аатынан Кустуур орто оскуолатын 10 кыл. үөрэнээччитэ, Эбээн-Бытантай улууһа.