Ыам ыйын 26 күнүгэр оскуола олоҕун биир саамай долгутуулаах, үөрүүлээх бырааһынньыга Тиһэх чуораан үрдүк тэрээһиннээхтик буолан ааста. Бырааһынньык үрдүкү кылаас выпускниктарыгар эрэ буолбакка, алын кылааһы бүтэрэр оҕолорго эмиэ улахан суолталаах. Быйыл 4-с кылааһы 5 оҕо ситиһиилээхтик бүтэрэн, орто сүһүөххэ тахсаллар: Никифоров Афоня, Саввина Юлиана, Аргунов Арылхан, Булдакова Саргылаана, Готовцева Айтыына. Кылаас салайааччыта – Елизавета Ивановна Варламова.
Тохсус кылааһы 7 оҕо бүтэрэр: Абрамов Эдуард, Готовцева Айыллаана, Готовцева Снежанна, Ларионов Ринат, Неустроева Анастасия, Петров Баатыр, Сивцева Эльмира. Кинилэр кылаастарын салайааччыта саха тылын уонна литературатын 1-кы категориялаах учуутала Любовь Семёновна Охлопкова буолар. Бу күн тохсустарга анаан кырачаан ыалдьыттар бэйэлэрин истиҥ эҕэрдэлэрин тиэртилэр. «Кэнчээри» уһуйаан иитиллээччилэрэ Черноградский Петя уонна Вензель Вера бастакы судаарыстыбаннай экзаменнарын ситиһиилээхтик ааһалларыгар баҕа санааларын тиэртилэр.
Саамай долгутуулаах, оскуолалыын быраһаайдаһар тэрээһин быйылгы 16 выпускникка буолла. Кинилэр маҥнайгы учууталлара Готовцева Мария Ильинична уонна Васильева Евдокия Романовна буолаллар.
Оскуолабыт 62-с выпускниктара кимнээҕий? Аргунов Нюргун, Бурнашева Кристина, Готовцева Валерия, Дьячковский Сема, Дмитриева Таня, Егоров Ваня, Егорова Женя, Колодезникова Вика, Мухина Туйаана, Неустроев Уйгун, Сивцев Арылхан, Сидорова Нарыйа, Слепцова Катерина, Тарабукин Антон, Тимофеева Сандра, Шапова Дарианна.
Бырааһынньык саамай долгутуулаах өрүтүнэн үөрэх чааһыгар дириэктэри солбуйааччы Вероника Васильевна Готовцева 9-с уонна 11-с кылаастары судаарыстыбаннай экзаменнарга киллэрии туһунан бирикээһи ааҕыыта буолла. Алын кылаас үөрэнээччилэрэ «С нами друг» диэн ырыанан эҕэрдэлэрин тириэртилэр.
Оскуолабыт дириэктэрэ Константин Георгиевич Готовцев, нэһилиэкпит баһылыга Савва Иванович Егоров, Саха Өрөспүүбүлүкэтин норуотун хаһаайстыбатын үтүөлээх үлэһитэ Иван Иванович Колодезников, Российскай Федерация үөрэҕэриитин бочуоттаах улэһитэ, өр сылларга оскуолабыт директорынан үлэлээбит Надежда Михайловна Егорова, Саха республикатын үөрэххэ уонна спортка туйгуна, Саха республикатын үтүөлээх тренера Максим Николаевич Аммосов уонна ытык кырдьаҕастар выпускниктарга инникитин ситиһиилээх буолалларыгар баҕа санааларын тиэртилэр, стипендия туттардылар. Быйылгы выпускниктарга киэн туттар, ытыктыыр, биир дойдулаахтарбыт, оскуолабыт бэтэрээн учууталларын, выпускниктарын Ховров Михаил Александрович, Готовцев Михаил Николаевич, Новогородов Николай Николаевич, Егорова Анна Никифоровна, Егорова Венера Николаевна, Готовцев Иван Павлович, Колодезников Сергей Константинович, Колодезников Степан Константинович, Тарский Николай Николаевич, Готовцев Никита Васильевич ааттарынан анал стипендиялары туттардылар.
Үөрэнээччилэр иитэн-үөрэтэн таһаарбыт учууталларыгар, тапталлаах төрөппүттэригэр истиҥ махталларын уонна эҕэрдэ ырыаларын анаатылар, нарын вальс үҥкүү хамнаныыларынан бары мустубут дьон дууһатын долгуттулар.
Ону таһынан, оҕо саас биир саамай чаҕылхай, айар куттаах кэрдиис кэмэ — Оҕо искусствотын оскуолатыгар үөрэнии — ситиһиилээхтик түмүктэннэ. Барыта 6 үөрэнээччи хас да сыллаах тулуурдаах үөрэҕи, элбэх репетициялары уонна сыралаах үлэни ситиһиилээхтик ааһан, долгуйар кэрэ күннэрин көрүстүлэр. Бурнашева Кира, Готовцева Снежанна, Егорова Күндүүнэ, Петров Баатыр, Мамонтова Туйаара, театральнай, Готовцева Айыллаана музыкальнай кылааһы бүтэрбиттэрин туоһулуур докумуоннарын туттулар.
Бу күн чугдаарбыт тиһэх чуораан оҕо сааһы кытта быраһайдаһыы, улахан олоххо үктэнии бэлиэтэ буолла. Выпускниктарбытыгар биир кэлим эксээмэннэрин ситиһиилээхтик туттаран баҕарбыт үөрэхтэригэр туттарсан киирдиннэр диэн алгыс тылбытын этэбит.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова хаартыскалара