Бүгүн, от ыйын 10 күнүгэр, Өрөспүүбүлүкэ саалатыгар Саха сирин бүттүүн киэн туттар оҕолоро муһуннулар. Ол биир кэлим эксээмэннэргэ 100 баалы ылбыт, орто үөрэх кыһаларыгар демонстрационнай эксээмэннэригэр чаҕылхайдык бэйэлэрин көрдөрбүт, бүтүн Арассыыйатааҕы үөрэнээччилэр олимпиадалырагр өрөспүүбүлүкэ чиэһин көмүскээбит оҕолор буолаллар. Хас биирдии оҕо туспа суоллаах-иистээх, ол эрэн кинилэри барыларын куттаммакка сыалларын ситиһии ситимниир.
Быйыл биир кэлим эксээмэҥҥэ 28 оскуоланы бүтэрээччи 100 баалы ылары ситистэ. Буоларын курдук, Өрөспүүбүлүкэтээҕи лиссиэй-интэринээт бастыҥ көрдөрүүлээх — 7 үөрэнээччи сүүс баалы ылла. Ону таһынан, С.К. Макаров аатынан Чурапчы гимназиятыттан сүүс баалы – 3 үөрэнээччи. Орто үөрэх кыһаларын истэригэр Н.Г. Чернышевскай аатынан Бүлүү профессиональнай-педагогическай колледжа үрдүк көрдөрүүлээх: икки выпускник эксээмэҥҥэ үрдүкү сыананы ылбыттар. Хас биирдии маннык ситиһии күүстээх үлэттэн, дьиэ кэргэн өйөбүлүттэн, учууталлар кыһамньыларыттан уонна сыһыаннарыттан кэлэр.
Оҕолор инникилэригэр өссө да элбэх күүтэр, оттон Саха сиригэр үүнүөн-сайдыан, кэҥиэн, айыан-тутуон баҕалаах оҕолорго туох баар сыал-сорук уонна кыах баар. Бу ааттары өссө элбэхтик истиэхпит диэн билэбин. Кинилэринэн Сахабыт сирэ эрэ буолбакка, бүттүүн Дойду киэн туттар буолуоҕа.
Источник: max.ru/aisen_nikolaev
Кэскил14.ру