В.П. Ларионов аатынан Майа орто оскуолатыгар оҕолору эт-хаан өттүнэн сайыннарар, доруобуйабытын бөҕөргөтөр, кыайыы чыпчаалыгар кынаттыыр сыаллаах остуол тиэниһин куруһуога ситиһиилээхтик үлэлиир. Тренер, куруһуок салайааччыта – СӨ физкультураҕа уонна спортка туйгуна Еремей Михайлович Куприянов.
Куруһуокупутугар күн аайы дьарыктанабыт, спорт бу көрүҥэр баҕалаах араас сүһүөх кылаас үөрэнээччилэрэ бүттүүн хабыллабыт. Үөрэх күнэ бүттэ да, анал саалаҕа ракетка тэлимнээбитинэн, мээчик тыаһа тиһигирээбитинэн барар.
Тиэнис куруһуогар дьарыктанан сымса буоларга, түргэнник туттарга-хаптарга, толкуйдуурга үөрэнэбит. Күннэтэ дьулуурдаахтык дьарыктанан, дойду таһымнаах турнирдарга өрөспүүбүлүкэбит аатын үрдүк таһымнаахтык көмүскүүбүт. Араас сылларга Владивосток, Хабаровскай, Нерюнгри куораттарга, Забайкальскай, Уһук Илиҥҥи кыраайдарга ыытыллыбыт күрэхтэргэ ситиһиилээхтик кыттабыт. Быйыл 7-с кылаас үөрэнээччитэ Антон Нестеров өрөспүүбүлүкэ хамаандатын састаабыгар киирэн, Уһук Илиҥҥи күрэхтэһиигэ кыайыылаах буолла. Чебоксары уонна Башкоторстан Салават куораттарыгар Россия финалыгар уонна үөрэнээччилэр спартакиадаларыгар кытта бараары бэлэмнэнэр. Оттон 5-с кылаас үөрэнээччитэ Тамара Сыдыкбекова Забайкальеҕа ыытылла турар Уһук Илиҥҥи первенствоҕа кытта сылдьар. Кини бу куруһуокка 1-гы кылаастан дьарыктанар, холобур туттар спортсменкабыт буолар. Кэлиҥҥи ситиһиилэрбититтэн үллэһиннэххэ, муус устар 9 – 10 күнүгэр Таатта улууһугар ыытыллыбыт Н.П. Турнин аатынан өрөспүүбүлүкэтээҕи турнирга Настя Борисова I, Антон Нестеров III миэстэ буоллулар.
Бу курдук, оҕолор остуол тиэниһинэн дьарыктанан, эргиччи сайдабыт, сонун сирдэри көрөбүт, араас омук оҕолорун кытта доҕордоһобут.
Саина Лонгинова, «Мэҥэбил» пресс-киин.