Оскуолабытыгар үөрэх дьылын түмүктүүр, самаан сайыны көрсөр Оҕо ыһыаҕа буолан ааста. Бу иннинэ сыл аайы «Зарница» буолар этэ. Оскуолаттан түмсэн, походтуур сиргэ арааһынай моһоллору ааһан айаннаан тиийэр этибит. Онтон быйыл төрөппүт сүбэтэ уларытан, ыһыах тэрийдэ.
Хата, күммүт туран биэрдэ. Тапталлаах Кургаммытыгар эрдэ тиийэммит «Ыллыктар», «Аартыктар» уонна «Дабааннар» диэн арахсан, түһүлгэлэрбитин киэргэппиппит.
Биһиги, улахаттар, хас биирдии оҕо салама, сахалыы ас, олбох аҕалбыппыт уонна бары түмсэн ким туох кыахтааҕынан түһүлгэбитин киэргэппиппит. Инньэ гынан түһүлгэ күрэхтэһиитигэр 2-с миэстэ, онтон сахалыы аска 3-с миэстэ буоллубут.
Ыһыахпытын оскуолабыт дириэктэрэ Алексей Валентинович алгыһынан арыйда. Сыл аайы оскуоланы бүтэрээччилэр төрдүс кылааһы бүтэрээччилэри кытта олоҥхолууллар. Биһиги эмиэ ол үгэһи салҕаан, кэнсиэр көрдөрдүбүт – биирдии кылаастан биирди нүөмэр. Үксэ ырыа толордулар. Биһиги кылааспытыттан Сайаана Ширяева үҥкүүлээбитэ.
Салгыы «Толбоннурар уһун сүһуох» кыргыттарга бөлөхтөрүнэн куонкурус буолла. Биһиги кылаастан түөрт кыыс кыттынныбыт. Кыайыылааҕынан Василиса Мосоркина ааттанна. Кини суһуоҕа уһуна – 8 тутум үс тарбах.
Дьэ ол кэнниттэн спортивнай күрэхтэһиилэр саҕаланнылар: уолаттарга – хапсаҕай, тутум эргиирэ, үс төгүл үс, кыыһы эккирэтии мас тардыһыыта; кыргыттарга – хары баттаһыыта, түү мээчигинэн сыал быраҕыыта, сүүрүү, сахалыы остуол оонньуулара.
Мин барытыгар кыттаммын сүүрүүгэ иккис миэстэ буоллум. Бэйэм үһүс миэстэ буолуом диэн эрэл санаалаах этим. Ыһыахпыт саамай интэриэһинэй күрэхтэһиитинэн «Кыыс эккирэтиитэ» буолла. «Ыллыктарга» Сайнаара Боппосованы Стас Мосоркин иккис эргииргэ биирдэ ситтэ. «Аартыктарга» Настя Данилованы бастыкы эргииргэ Максим Рахлеев омунугар ситэ баттаан, иккиэн охтон түстүлэр. Онтон «Дабааннарга» өрөспүүбүлүкэҕэ кыттар сүүрүк уолбут Виталий Петров Сайыына Сидорованы өр гыммакка ситэ баттыыра эрдэттэн биллэр этэ. Сайыынаттан хайдах этэй диэн ыйыппыппар: «Наһаа кутталлаах этэ», – диэн күлэ-үөрэ санаатын үллэһиннэ.
Сүрүн күрэхтэһиилэр бүппүттэрин кэнниттэн Таатталыы уонна Бүлүүлүү түөртэ оһуохайдаатыбыт. Оһуохайы Алина Таппырова, Айаана Семёнова, Лена Федотова уонна дириэктэрбит таһаардылар.
Ол кэнниттэн түһүлгэнэн олорон аһаатыбыт, хаартыскаҕа түстүбүт.
Салгыы уолаттарга хапсаҕай, мас тардыһыыта, үс төгүл үс күрэхтэһиилэр буоллулар. Хапсаҕайга муҥутуур кыайыылааҕынан Айыллаан Неустроев ааттанна.
Ыһыах бүтүүтүгэр үс хамаанданан арахсан, сөбүлүүр «Зарницабыт» оонньуутун – эполет былдьаһыытын онньоотубут.
Ити курдук ыһыах түһүлгэтиттэн оҕолор бары грамоталаах, мэтээллээх, бирииистээх, этэргэ дылы, «илии тутуурдаах, өттүк харалаах» астынан, дуоһуйан тарҕастыбыт. Төрөппүттэрбит, учууталларбыт тэрийэн, спонсордаан маннык үөрүүлээх бырааһынньыгы бэлэхтээтилэр.
Оҕо сааһым өссө биир кэрэ түгэнин, оскуолам бүтэһик тэрээһинин умнуом суоҕа.
Ангелина ДАНИЛОВА, В.И. Ленин аатынан
Уолба орто оскуолатын 2025 с. выпускнига, Таатта