«Кэскил» медиа-оскуолаҕа дьарыктанар юнкордарга олохпутугар олус эппиэтинэстээх түгэн буолан ааста. Ол курдук муус устар ый саҕаланыытыгар дойдубут киин куоратыгар Москваҕа Бүтүн Арасссыыйатааҕы «Юнкор» медиафорумҥа кыттыыны ыллыбыт. Саха сириттэн Хаҥаластан, Бүлүүттэн, Мэҥэ Хаҥаластан биэс юнкор талыллан кыттар быраабы ылбыппыт. Биһигини Танда оскуолатыттан «Кэскил» медиа-оскуола салайааччыта Анна Егоровна Никифорова салайан илдьэ сырытта.
Биллэн туран, түөрт Геройдаах нэһилиэк олохтоохторо буоларбыт быһыытынан, бу сырыыбыт биһиги эппиэтинэспитин икки бүк үрдэппитэ.
«Юнкор» медиафорумҥа Арассыыйа араас муннуктарыттан уопсайа 120-тэн тахса юнкор оҕо кэлбит.
Муус устар 2 күнүгэр көтөн тиийэт, Шереметьево аэропортан Амурскай уобалас делегациятын кытта «Арт-Москва» отельга айаннаабыппыт. Бу күн форум үөрүүлээх арыллыыта, Арассыыйа Геройа, «Юнармия» сүрүн штабын начальнига Владислав Головины кытта көрсүһүү, кэпсэтии буолбута. 2026 сылга «Юнармия» 10 сылын бэлиэтиир. Бу медиафорум сүрүн сыалынан манна кэлбит юнкордары бу буолаары турар тэрээһиннэри сырдатыыга үөрэтии.
Үс күн устата элбэх лекцияларга, маастар кылаастарга, интэриэһинэй көрсүһүүлэргэ сырыттыбыт. Мин ордук Азиз Султанов «Инструменты ИИ для медиасферы» уонна Дмитрий Чапков дьон иннигэр саҥарарга, туттарга-хаптарга үөрэппит маастар кылааһын сөбүлээтим.
Сарсыардаттан киэһээҥҥи диэри лекция истэн баран, тугу билбиппитин, иҥэриммиппитин үлэбитигэр көрдөрдүбүт. Хамаандаларга арахсыбыппыт. Мин 24-с хамаандаҕа түбэспитим. Оҕолору кытта түргэнник билсибиппит, кэпсэпиппит.
Медиафорум үһүс күнүгэр форуммут сабыллыытыгар огонёктаан, гитаранан ыллаан олус истиҥ, сылаас биэчэр буолбута. Ол кэнниттэн бэйэ-бэйэбитигэр сэмэй бэлэхтэрбитин туттарбыппыт. Биһиги Саха сириттэн харысхаллары, сахалыы оҥоһуктары уонна Арассыыйа үрдүнэн тарҕанар «Юность Севера» научнай сурунааллары илдьэ баран бэлэхтээтибит.
Москва куоракка сылдьан наһаа үөрдүм. Экспердэр үөрэппиттэрэ, биэрбит билиилэрэ инникитин олус туһалаах буолуо диэн эрэнэбин.
Биһигини саалйан илдьэ сылдьыбыт салайааччыбар Анна Егоровна Никифороваҕа, айаммытын үбүлээн ыыппыт төрөппүттэрбэр уонна «Кэскил» медиа-оскуолабар дириҥ махталбын тиэрдэбин.
Туйаара МАМОНТОВА, Х кылаас,
М.Н. Готовцев аатынан Танда орто оскуолата, Уус Алдан
Ааптар хаартыскалара