Итинник ааттаах ыстатыйа 1959 сыллаахха «Бэлэм буол» хаһыат кулун тутар 5 күнүнээҕи нүөмэригэр бэчээттэммит. Бу ыстатыйаҕа хаһыат үлэһиттэрэ Саха государственнай университета, билиҥҥинэн Хотугулуу-Илиҥҥи Федеральнай университет дьиэтин тутууга туох үлэ ыытылла турарын туһунан кэпсээбиттэр:
«Өссө 1957 сыллаахха «Якутпроект» контора Якутскайдааҕы государственнай университет саҥа дьиэтин бырайыагын оҥорууну саҕалаабыта. Ааспыт сыл кулун тутар ыйга университет тутуутун бырайыага 49 мөлүйүөн солкуобай сууммаҕа көрүллэн бигэргэтиллибитэ.
Университет үөрэнэр корпуһун тутуута аан маҥнайгынан саҕаланыа. Ити корпус билиҥҥи ССРС наукаларын Академиятын Саха сиринээҕи филиалын дьиэтинээҕэр үс төгүл улахан буолуоҕа.
Икки биэстии этажтаах, биирдиитигэр 419-туу киһи киирэр, 200 киһиэхэ аналлаах остолобуойдаах студеннар олорор уопсай дьиэлэрэ тутуллуо.
Итини таһынан 32 квартиралаах университет преподавателлэрэ, профессордара олорор дьиэлэрэ тутуллара көрүллэр.
Университет-куорат биһиги республикабыт столицатыгар саамай бөдөҥ тутуу буолуоҕа. Университет акылаатын түһэрии уонна араас тутууларын ыытар үлэлэрэ быйыл саҕаланыахтара».
Эн оскуолаҕын бүтэрэн, бу күннэргэ уруккунан М.К. Аммосов аатынан Саха государственнай университета, билиҥҥинэн М.К. Аммосов аатынан Хотугулуу-Илиҥҥи Федеральнай университет устудьуона буолар туһугар буһа-хата, долгуйа сылдьаҕын. 67 сыл аннараа өттүгэр суруллубут ыстатыйаны ааҕан, биһиги өрөспүүбүлүкэбит үрдүк үөрэҕин кыһатын историятын билис.
кэскил14.ру