Оҕо көмүскэлин Аан дойдутааҕы күнүн көрсө «Бэлэм буол» хаһыат урукку нүөмэрдэрин арыйан көрдүбүт.
1959 сыл. «Бэлэм буол» хаһыат 1959 сыл олунньу 19 күнүнээҕи нүөмэригэр Мэҥэ Хаҥалас оройуонун Павловскай сэттэ кылаастаах оскуолатыгар үлэлиир музыкальнай куруһуок туһунан суруйбуттар. Манна үгүс үөрэнээччи кыттар эби. Кинилэр биир да дьарыгы көтүппэккэ сылдьаллар эбит. Хаһыат бу нүөмэригэр куруһуок чилиэннэрэ, 5-с кылаас үөрэнээччилэрэ Шура Никанорова уонна Слава Ли хаартыскалара бэчээттэнэн үйэтитиллибит.
1977 сыл. «Бэлэм буол» хаһыат 1977 сыл от ыйын 7 күнүнээҕи нүөмэригэр Уус Алдан оройуонун Дүпсүн орто оскуолатын Х кылааһын үөрэнээччитэ Глера Готовцева суруйуута бэчээттэммит. Глера суруйбутунан сирдэттэххэ, 1977 сыллаахха Дүпсүн орто оскуолатын 10-с кылааһын 51 оҕо бүтэрбит. Ситии-хотуу аттестатын иһин сыралаах экзамены туттарбыттар. Нуучча тылын сочинениетыгар 12 оҕо «4» уонна «5» сыананы ылбыт. Кинилэр ортолоругар Марик Куличкин, Света Стрекаловская уонна Глера Готовцева бааллар эбит. Алгебраны эмиэ үчүгэйдик туттарбыттар: аҕыс оҕо «5», «4» сыананы ылбыт. Дүпсүн орто оскуолатын 1977 сыллаах выпускниктара үгүс өттүлэрэ төрөөбүт сопхуостарыгар үлэлии барар былааннаахтар эбит.
«Бэлэм буол» хаһыат 1977 сыл от ыйын 7 күнүнээҕи нүөмэригэр убайдыы-балыстыы Ваня уонна Катя Кривогорницыннар хаартыскалара бэчээттэммит. Кинилэр ити кэмҥэ сайыҥҥы сынньалаҥнарыгар төрөөбүт Абыйдарыгар бараары үөрэ сылдьаллар эбит. Ваня ити кэмҥэ Майа орто оскуолатын II «А» кылааһын ударнига, Катя Хара оскуолатын I кылааһын туйгун үөрэнээччилэрэ. Катялаах Ваня «Бэлэм буол» хаһыаты сөбүлээн, сэргээн ааҕаллар эбит.
кэскил14.ру