Уолаттар сэриилэһэ оонньууллара урут даҕаны, билигин даҕаны баар. Атына диэн билигин куйаар ситимин нөҥүө дойду хайа баҕарар муннугуттан олорон оонньууллар. Оттон дьиҥнээх сэрии мөссүөнүн, сэрии алдьархайын, сэрии оҕо оонньуута буолбатаҕын туһунан «Бэлэм буол» хаһыат 1990 сыл ыам ыйын 8 күнүнээҕи нүөмэригэр суруйбутун өссө биирдэ чуумпуран олорон ааҕыаххайыҥ.
«Сэриилэһэ оонньуургун төһө сөбүлүүгүнүй?” – диэн хайа баҕарар уолчаантан ыйыттахха эппиэт бэлэм буолуо. Ити оонньууну олус таптыырын туһунан кэпсээн-ипсээн омуннуруо.
– Оонньуурдарбыттан саамай ордорорум автоматым. Убайдарбын кытта субу-субу “сэриилэһэбит”. Өссө оҕолор мунньустан тыаҕа пограничиктаан, бандьыыттаан оонньооччубут. Бэрт баҕайы, – диир V-кэ үөрэнэр Олег Морозов. – Бу оонньууну бары астыналлар. Маннык “сэриитэ” суох уолаттар чуҥукуйаллар.
Оҕолор сэриилэһэ оонньууллар. Онтон дьиҥнээх сэрии оонньуу буолбатах.
Сэрии аҥардас кыайыы-хотуу, хорсун быһыы эрэ буолбатах. Сэрии – бу өлүү-сүтүү, тоҥуу-хатыы, аччыктааһын. Сэрии – бу харах уута…
Аҕа дойду Улуу сэриитигэр чэпчэкитик сыһыаннаһар табыллыбат. Бу улуу советскай норуот бүтүннүүтүн алдьархайа этэ…
Бу үлүгэри ойууга да көрбүт киһи куйахата күүрэр, этэ салаһар. Оттон арай эн арай эн тус бэйэҥ ити ыар сэриини эккинэн-хааҥҥынан билбит, өлөр-өлүүнү көрбүт, хоргуйбут, таһыллыбыт буол… Суох! Оннук эрэ буолбатын! Ол туһугар тыыннааҕыҥ тухары өлбүттэр иннилэригэр умнубат иэстээххин өйдөө: хааннаах фашистар элбэх киһини ыйаабыт мастарын, субу буомбалаары элиэтээн эрэр өстөөх самолетуттан куттанан оҕолор оҥой-соҥой көрбүт харахтарын, сиэхситтэр кыдыйбыт тыһыынчанан дьонун, олор быыстарыттан чугас киһитин булбут дьахтар кыланыытын, концлагердарга сору-муҥу көрбүт дьоннорбутун… Өйдөө, умнума, Тыыннаах Киһи!«.
кэскил14.ру