Аныгы кэм оҕолоро комиксы сөбүлээн ааҕаллар. Ол иһин «Кэскил» оҕо бэчээтин кыһата Саха Cирин улуустарын номохторунан комикстары оҥорууну өссө 2023 сылга саҕалаабыта. «Бэлэм буол» сурунаал 2023, 2024, 2025, 2026 сс. нүөмэрдэригэр өрөспүүбүлүкэбит 35 улууһун уонна киин куораппыт Дьокуускай номохторунан сахалыы комикстар уруһуйданан тахсыбыттара. Түгэх өбүгэлэрбит олохторо киһи толкуйун күүһүрдэр, кэҥэтэр айылгылаахтар. Онон улуустар номохторунан оҥоһуллубут комикстары барытын бииргэ түмэн электроннай кинигэ оҥордубут. Саха Өрөспүүбүлүкэтин Национальнай бибилэтиэкэтин электроннай полкатыгар киллэрдибит. Бу сигэнэн киирэн ааҕыаххытын сөп: https://nlrs.ru/open/155668
Төрөөбүт норуоппут туһунан үйэлэри уҥуордаан кэлбит номохтор оҕолорбут сахалыы мындыр толкуйдарын, өйдөрүн-санааларын сайыннардын, ыырдарын кэҥэттин, дьону-сэргэни кытта, оннооҕор атын омук дьонун кытта алтыһар кыахтарын күүһүрдэн биэрдин.
Орто уонна үрдүкү сүһүөх кылаас оҕолоругар аналлаах «Бэлэм буол» сурунаал 2023, 2024, 2025, 2026 сс. нүөмэрдэригэр бэчээттэммит Саха сирин улуустарын номохторунан комикстар «ЭРКЭЭЙИ ЭРГИИРЭ» бырагыраама сүрүн туһаайыыларыгар олоҕурар.
кэскил14.ру