Кыра эрдэҕиттэн уруһуйга дьоҕурдаах кыыс экономист үөрэҕин бүтэрэр. Ол эрээри, дууһатыгар быдан чугас эйгэҕэ тардыһар. Өйө-санаата, сүрэҕэ-быара сыыппаралар диэки сыппатын өйдүүр уонна уруһуйугар чугас, айар үлэни талар. Туорт астааһыныгар көһөр…
Күн сардаҥата, түннүгүнэн сып-сырдык уотунан чаҕылыччы тыган, кырачаан кыыһы дьээбэлиир, кылабачыҥнаан ааһар. Кыысчаан сайыҥҥы күнтэн санаата көтөҕүллэн, үөрэ-көтө куукунатыгар бурдукка буккулла турар. Тугу эрэ астыыр, тиэстэтин мэһийэр. Арааһа туох эрэ минньигэһи оҥорон эрдэҕэ дуу? Сотору-сотору аһын боруобалыыр.
Кыыспыт аата Кюннэй, бэйэтэ даҕаны, күн курдук сырдык дьүһүннээх, нарын-намчы майгылаах. Үчүгэй үөрэнээччи, ийэтигэр сүрүн көмөлөһөөччү. Кыра бырааттаах буолан, оҕотун атаахтатаары, минньигэс аһы буһаран күндүлүүр. Онон ийэтиттэн хайҕанар.
Саамай сөбүлүүр дьарыга – уруһуй. Улааттаҕына, худуоһунньук эбэтэр дизайнер буолуон баҕарар.
«Биисинэстээх» кыыс
Арай биирдэ, дьиэтин аттыгар, чэпчэки сыаналаах маҕаһыын арылынна. Кюннэйбит онно киирэн, сыаналарын көрөн баран, биисинэс оҥостуон баҕарда.
“Таак, маны чэпчэки сыанаҕа атыылаһан бараммын, оскуолаҕа икки төгүл ыараханнык атыылыыр эбиппин”, — диэн быһаарда. Уонна бэйэтэ мунньубут аҕыйах харчытынан хас да сакалааты ылла.
Онтон дьиэтигэр тиийэн, «биисинэһин» туох диэн ааттыырын, сыаналарын ханна суруйарын толкуйугар түстэ. Уһун-киэҥ толкуй кэнниттэн, каталог уруһуйдаан баран, ангылычаан тылын үчүгэйдик билэр буолан, “Tasty & Sweet” (“Амтаннаах уонна минньигэс”) диэн сүрэхтэннэ.
Оскуолатыгар тиийбитигэр, бииргэ үөрэнэр оҕолоро саба түһэн, биир да сакалааты, кэмпиэти хаалларбакка, барытын атыыластылар. Кыыспыт үөрэн, иккис төгүл ол маҕаһыыныгар барда. Икки төгүл элбэҕи атыыласта. Кылааһыгар дьүөгэлэрэ, атастара аны киниттэн ол минньигэстэрин иэс ылан үөрдүлэр. Күннэй эмиэ үөрэр, сарсын харчы аҕалыахтара дии саныыр. Ол эрээри, сэрэйбиппит курдук, оҕолоро иэстэрин умнан-тэннэн аҕалбакка, кыыспыт биисинэһэ түмүктэннэ.
Пираттар туортара
Кюннэй кыра эрдэҕиттэн араас кинигэлэртэн көрөн, минньигэс бурдук аһы, киһи кэрэхсии көрөр бүлүүдэлэрин астыырын олус сөбүлүүр. Төрөппүттэрин соһутаары, үөрдээри кыһаллар.
Киһи саныырын, көрөрүн курдук, туорду астыыр чэпчэки буолбатах. Тиэстэтэ табыллыахтаах, кириэмэ үчүгэй буолуохтаах, киэргэтиитэ киһини сэҥээрдиэхтээх.
Кюннэй быраатыгар анаан, пират тиэмэтигэр астаабыт туорда олус табыллыбыт. Киэргэтиитэ мастиканан оҥоһуллубут буолан, көстүүтэ тупсубут. Амсайбыт дьон бары ис сүрэхтэриттэн хайҕаабыттар.
Асчыппыт күнү быһа биир туорду оҥорбутуттан олус сылайбыт, ол гынан баран, бэркэ табыллыбытыттан наһаа үөрбүт. Онтон ыла кыра-кыралаан, хас биирдии бырааһынньыкка, аймахтарыгар астаан күндүлүүр.
Үлэҥ үрдүктүк сыаналанара күндү
Оскуолаҕа үөрэнэ сылдьан туйгун үөрэнээччи буолуон наһаа баҕарара. Кыһалла-кыһалла үөрэн да үөрэн, онтон түмүккэ, наар биир түөртээх буолан хаалара. Үрдүкү кылааска тахсан, дьэ, туйгун буолбут. Ол гынан баран, баҕарбыт мэтээлин ылбатах…
—Онно наһаа хомойботоҕум. Баҕалаах үөрэхпэр киириэм диэн билэрим. Оскуола кэнниттэн үс идэҕэ үөрэммитим: экономист, салайааччы уонна, бу бүтэһигим, кондитер.
Кыра эрдэхпиттэн ону-маны астыырбын сатыыбын сөбүлүүбүн. Ол да буоллар, хаһан даҕаны кондитер буолуом дии санаабатаҕым. Сөбүлүүр дьарыгым үлэм буолбутуттан дьоллоох киһибин дэнэбин.
Кондитер, ханнык баҕарар үлэ курдук, ыарахаттардаах да буоллар, дуоһуйа үлэлиибин. Астынарым диэн сакаастаабыт дьонум үтүө тыла, сыанабыла. Ону истэн, кэрэни, үтүөнү оҥорорбун өйдүүбүн. Билэр, билбэт киһин бырааһынньыгар эн үлэҥ үрдүктүк сыаналанара күндү.
Кюннэй “Solnyshkina” туох баар сатабылын, дууһатын, үчүгэй санаатын ууран туран, дуоһуйа үлэлиирин иһин, туортара олус минньигэс буолан тахсаллар. Оннооҕор, Саха сиригэр биллэр улахан хампаанньалар, кини туортарын сакаастыыр буолбуттара ыраатта.
“Кондитер” диэн кимий?
“Кондитер” диэн Италияттан кэлбит тыл. Икки тыл холбоспутуттан үөскээбит:
“Кандиере” — саахарга буһарар,
“Кондитор” – асчыт киһи, повар.
Онон, “Кондитер” – минньигэс, саахардаах аһы оҥорор киһи.
Ааптар: Айаана Третьякова.