Кулун тутар 12 күнүгэр Лөгөй лиссиэй-интэрнээтигэр сылын ахсын ыытыллар Саха АССР үтүөлээх учуутала, РСФСР үөрэҕэриитин туйгуна Петр Петрович Оҕотоойоп аатынан 26-с улуустааҕы, 5-с Өрөспүбүлүкэтээҕи нуучча тылын олимпиадата буолан ааста. Олимпиада үөрүүлээх арыллыытыгар Петр Петрович Оготоев уола Егор Петрович Оготоев кэргэнинээн Светлана Алексеевналыын кыттыыны ыллылар.
Быйылгы олимпиадаҕа Дьокуускай куорат Саха-Корейскай оскуолатын нуучча тылыгар уонна литературатыгар учуутала Ирина Витальевна Бочкарева 9 кылаастарга аһаҕас уруок уонна улууспут учууталларыгар анаан маастар кылаас ыытта. Ирина Витальевна — «Сыл бастыҥ учуутала — 2013» күрэх кыайыылааҕа, Россиятааҕы «Россия бастыҥ учуутала» күрэх финалиһа.
Күрэххэ улууспут оскуолаларыттан күөн көрсө Лөгөй лиссиэйин түһүлгэтигэр 133 оҕо тоҕуоруһа муһунна. Маны тэҥэ кэтэхтэн өрөспүүбүлүкэбит араас муннактарыттан: Таатта, Чурапчы, Амма, Бүлүү, Дьокуускай уонна Миирнэй куораттан 339 оҕо нуучча тылын сэҥээрэр оҕолор кыттыыны ыллылар. Олимпиада 4-8 кылаас үөрэнээччилэригэр ыытылынна.
Быйылгы олимпиада күрэҕин уратыта диэн Кыайыы 80 сылыгар анаан нууччалыы хоһоон ааҕытын бэрт таһымнаахтык ыытылынна. Күрэх икки бөлөҕүнэн дьүүллэннэ: 1 бөлөх — 4-6 кылаастар, 2 бөлөх — 7-9 кылаастар.
Биһиги оскуолаттан 4 кылаас үөрэнээччилэр Күннэй Хабарова, Дамир Прядезников 2 миэстэни ылары ситистилэр, учууталлара Наталья Семеновна Олесова. Уонна 7 кылаас үөрэнээччитэ Семен Петров 3 бочуоттаах миэстэни ылла. Хоһоон ааҕыытыгар Ксюша Находкина 3 миэстэ буолла, учууталлара Лена Петровна Бурнашева. Бары ситиһиилээх оҕолору, учууталлары эҕэрдэлиибит.
Янис СЫСОЛЯТИН Лөгөй лиссиэй-интэрнээт «SiTiM LegMedia» юнкора
Фото: Родион Перевалов, Коля Марков