П.А. Павлов аатын сүгэр Бүлүү улууһун I Күүлэт орто оскуолатыгар «Бүтэһик Чуораан» оскуоланы кытта быраһаайдаһар банкет буолан ааста. Быйылгы үөрэх дьылын тоҕус оҕо бүтэрэн, олох өссө биир үктэлин дабайдылар.
Төрөөбүт нэһилиэктэрин оскуолатын өйөөн, бастыҥ ситиһиилээх, үөрэххэ үрдүк көрдөрүүлээх оҕолорго көмөлөһөн, биһиги выпускниктарбыт, нэһилиэк ытыктыыр, ааттаах-суоллаах дьоммут, кинилэр аймахтара хас үөрэх дьыла бүтүүтүгэр туруорар бириэмийэлэрэ, стипендия туттарыыта үтүө үгэскэ кубулуйда. Бу стипендия анала – үөрэҕэр туйгун, оскуола уонна нэһилиэк ыытар тэрээһиннэригэр көхтөөхтүк кыттар, куруук күүс-көмө буолар, олоххо көхтөөх оҕолору өйөөһүн буолар.
2024-2025 сс. үөрэх дьылын түмүгүнэн уонна Улуу кыайыы 80 сылынан үгэс быһыытынан бэриллэр Аҕа дойду улуу сэриитин кыттыылааҕа, «Германияны Кыайыы иһин» мэтээллээх, «Слава» уордьан III истиэпэннээх уонна «Аҕа дойду сэриитэ» I истиэпэннээх уордьаннар кавалердара, нэһилиэк ытыктанар киһитэ Александр Гаврильевич Егоров аатынан анал бириэмийэ XI кылаас үөрэнээччитэ Нарыйаана Владимировна Васильеваҕа ананна. Бу стипендияны Александр Гаврильевич уола, СӨ култууратын үтүөлээх үлэһитэ, СӨ суруналыыстыкаҕа судаарыстыбаннай бириэмийэтин лауреата, Россия суруналыыстарын Сойууһун чилиэнэ Николай Александрович Крылов олохтообута.
Нарыйаана бу оскуолаҕа I кылаастан үөрэнэр. Оскуолаҕа үөрэнэ киириэҕиттэн үөрэҕэр сүрдээҕин кыһаллар, наар үчүгэй уонна туйгун эрэ сыанаҕа үөрэнэн кэллэ. Ордук сөбүлээн, интэриэһиргээн естественнэй, математическай хайысхалаах предметтэргэ дьарыктанна. Элбэх кинигэни ааҕар, эбии билии ыларга сүрдээх дьаныардаах. Сылын аайы оскуола иһинэн, кустовой, улуустааҕы олимпиадаларга ситиһиилээхтик кыттар. Оскуолаҕа, нэһилиэккэ ыытыллар культурнай тэрээһиннэр, бырааһынньыктар, күрэхтэһиилэр көхтөөх кыттыылаахтара. Аныгы үйэ ирдэбилинэн, Интернет нөҥүө “Добро” диэн университет үөрэнээччитинэн буолбута, 2024 сыллаахха Дьокуускай куоракка ыытыллыбыт “Азия оҕолоро” норуоттар икки ардыларынааҕы оонньуулар бэлэмнэниилэригэр уонна ыытыллыыларыгар көхтөөхтүк, кыһамньылаахтык кыттыбытын иһин “Лучший волонтер” диэн аат сүктэриллэн, дипломунан уонна махтал суругунан наҕараадаламмыта. Нарыйаана сүрдээх элбэх табаарыстаах. Кытаанах, ол гынан баран, сымнаҕас санаалааҕынан, күүстээх дьулуурдааҕынан биир саастыылаахтарын ортотугар убаастанар. Үөрэххэ да, араас тэрээһиннэргэ элбэх интэриэһинэй идеялары, саҥа сүүрээннэри киллэрэри, боруобалыыры Нарыйаана сүрдээҕин сөбүлүүр.
Нарыйаанаҕа биир кэлим эксээмэннэрин ситиһиилээхтик туттаран, сөбүлүүр үөрэҕэр киирэн, үтүө үлэһит буоларыгар баҕарабыт.
Оскуола иһинээҕи бэйэни салайыныы, эдэр кэрэспэдьиэннэр түмсүүлэрин оҕолоро, I Күүлэт, Бүлүү улууһа.
keskil14.ru