Бүгүн Наука эйэ уонна сайдыы иһин аан дойдутааҕы күнэ бэлиэтэнэр. Өлүөхүмэ улууһун А.Г.Кудрин-Абаҕыыныскай аатынан Абаҕа орто оскуолатын XI кылааһын үөрэнээччитэ Мичил Егоров «Наукаҕа бастакы хардыыларым” диэн суруйуутун билиһиннэрэбит.
Мин чинчийэр үлэнэн 4-c кылаастан дьарыктанан саҕалаабытым. Бастакы тиэмэм “Олоҥхо геройдара” диэн этэ. Ол тиэмэнэн үлэбинэн аан бастаан кэмпириэнсийэҕэ кыттыбытым.
Онтон 5-с кылааска чинчийэр үлэни салҕаабытым. Сахаҕа үгэс буолбут муус ылыытын чинчийбитим. Санаан көрдөххө, киһи барыта дьарыктанар үлэтэ, барыта биллэр курдук. Ол эрээри бу үлэбинэн “Наукаҕа бастакы хардыы” диэн үөрэнээччилэр чинчийэр үлэлэрин Бүтүн Россиятааҕы куонкуруһугар уонна өрөспүүбүлүкэтээҕи Ощепковскай ааҕыыларга 2 миэстэ буолбутум.
Нуучча Географическай обществота биллэрбит куонкуруһугар “Нуучча Географическай обществота Саха сирин норуоттарын историятын уонна этнографиятын чинчийиитэ” диэн тиэмэнэн кыттыбытым. Сибиряков экспедициятын үлэтин хас да сыл чинчийбитим. Бу куонкуруска кыайан, “Океан” лааҕырга сынньанар путевканан наҕараадаламмытым. Лааҕырга олус үчүгэйдик сынньаммытым, араас тэрээһиннэргэ кыттыбытым, онон “Океан доҕотторун мунньар” диэн үбүлүөйдээх симиэнэҕэ лааҕыртан ыҥырыы тутан, иккистээн барар чиэскэ тиксибитим.
9 кылааска үөрэнэ сылдьан, юрист идэтин интэриэһиргээн, «Саха сирин силиэстийэлиир уорганнара Аҕа дойдуну көмүскүүр Улуу сэрии кэмигэр» диэн үлэнэн Бүтүн Россиятааҕы «Эдэр следователь» куонкуруска кыттан, онно кыайыылаах тахсан, Бүтүн Россиятааҕы «Смена» лааҕырга путевканан наҕараадаламмытым.
Чинчийэр үлэ киһи тылын — өһүн сайыннарар, араас саҥа билиини ылаҕын, онон олус туһалаах дии саныыбын. Ону таһынан, араас куонкурустарга кыттан, сири — дойдуну көрүөххэ сөп.
Быйыл оскуоланы бүтэрээри сылдьабын. Салгыы үөрэнэрбэр бу оскуолаҕа сылдьан чинчийэр үлэнэн дьарыктаммытым туһалыа, үөрэхпэр көмөлөөх буолуо дии саныыбын.