Ыам ыйын 9 күнэ Кыайыы күнэ. Киһи-аймахха дириҥ өйдөбүллээх, өрөгөйдөөх күн! Быйыл Аҕа дойду улуу сэриитэ түмүктэммитэ 80 үбүлүөйдээх сыла! Бу күн бүтүн Арассыыйа үрдүнэн сэлэлии хаамыы ыытылынна. Ол курдук, Лөгөй нэһилиэгиттэн 144 эр дьон Аҕа дойду сэриитигэр ыҥырыллан ийэ дойдуларын көмүскүү барбыттара. 74 буойун олохторун толук уурбуттара. Сэрии толоонугар кыргыспыт хорсун буойуттарга, тыылга күргүөмнээхтик үлэлээбит Аҕа көлүөнэ дьон үтүө аатыгар сүгүрүйэн туран Улуу Кыайыы 80 сылын уруйдаан Кэптэнигэ күргүөмүнэн сэлэлии хаамыы буолан ааста.
Үбүлүөйдээх парад 9 колоннаттан турда, парадка кыттыыны ыллыллар: 1 колонна — Кыайыы знамятын тутааччылар, Лөгөй нэһилиэгин баһылыга Попов Н. Н., анал байыаннай дьайыы кыттыылаахтара; «Бессмертный полк», Лөгөй нэһилиэгин бэтэрээннэрэ, аҕам саастаах дьонноро; 3 колонна — олохтоох бэйэни салайыыны дьаһалтата; 4 колонна — кыра тэрилтэлэр; 5 колонна — МПЧ — 6 баһаарынай чаас үлэһиттэрэ; 6 колонна — итиитинэн хааччыйар ЖКХ тэрилтэтин үлэһиттэрэ; 7 колонна — Кэптэнитээҕи амбулатория, 8 колонна — «Чэчир» оҕо уһуйаана уонна 9 колонна -—Лөгөй лиссиэй үөрэнээччилэрэ, үлэһиттэрэ.
Лөгөйбүт нэһилиэгин бары дьоно-сэргэтэ Кыайыы парадыгар Кэптэни киэҥ, уһун уулуссаларынан биир тэҥҥэ, өрө көтөҕүллүүлээхтик хааман Кыайыы болуоссатыгар бырааһынньыктааҕы миитиҥҥэ тоҕуоруһа муһунна. Быйылгы парадка «Победный транспорт» диэн тимир көлөнү киэргэтии күрэҕэ ыыттыллан парад көстүүтүн өссө күүскэ киэргэттэ. Бу күрэххэ «Чэчир» оҕо уһуйаана кыайыылаах аатын сүктэ.
Бүтүн Аан дойду историятын уларыппыт киһи-аймах дьылҕатыгар дьайбыт Улуу Кыайыы суолтата өлбөөдүйбэт, намтаабат, дьон өйүгэр-санаатыгар ытык өйдөбүл буолан көлүөнэттэн көлүөнэҕэ бэриллэр. ХХ үйэ алдьархайын тохтоппут, Улуу Кыайыыны уһансыбыт хас биирдии саха саллаатын сырдык мөссүөнэ, албан аата эйэлээх ХХI үйэҕэ олорор, айар-тутар Саха сирин эдэр дьонун өйүгэр-санаатыгар, сүрэҕэр-быарыгар дьоһун дьоруой быһыытынан хаалыа диэн эрэнэбит!
Суруйда Янис СЫСОЛЯТИН Лөгөй лиссиэй-интэрнээт юнкора
Хаартыскаҕа түһэрдэ «LegMedia» юнкора Родион Перевалов